Kovalima, 22 Juñu 2026 (TATOLI) – Organizasaun Internasionál (ONG), World Food Programme (Sigla Inglés) fasilita treinamentu kona-bá implementasaun jestaun Programa Merenda Eskolar (PME) ba dirijente eskola sira iha postu administrativu Suai, Munisípiu Kovalima.
“Objetivu ba programa no nia papel iha edukasaun nutrisaun no Agrikultura, rekuñese, papel parseiru interisada-sira iha nivél nasionál munisipál no iha eskola, hala’o dever sira iha prosesu kompras, armazenamentu no kontrolu kualidade,envolve grupu kooperativa agrikultór-sira atu hametin kadeia valor no empoderramentu komunidade, prepara háhan nutritivu no promove edukasaun no aplika ijeine no nutrisaun iha eskola sira, haforsa servisu ekipa rezolve problema sira no planeamentu kolaborativu no Dezenvolve kontextu espesifiku ba planu asaun sira atu promove implementasaun programa merenda eskolar,” Pontu Vokál Merenda Eskolár WFP, Paulino Pinto hato’o liuhusi nia diskursu iha salaun AMC, ohin.
Treinamentu ne’ebé fasililita husi WFP ne’e partisipa husi dirijente eskola sira kompostu husi, Diretór Eskola, tékniku implementasaun PME, Jestór ba Implementasaun ba PME husi postu Suai ba sesaun dahuluk eskola husi EBC Suai-Loro ho nia filial 4 , EBC Beco ho filial , Gala ho nia Filiál 4
Iha fatin hanesan, Xefe Departamentu Kapasitasaun Jestaun Finansa Munisipál MAE, Maria Guterres do Rosário dehan, Papél Ministériu Administrasaun Estatal (MAE) garante atu aloka orsamentu ba munisípiu.
“Ita hotu responsabiliza hodi haree kualidade ai-han ne’ebé mak hodi fornese ba ita nia oan sira iha eskola,”nia dehan.
Entretantu, Prezidente Autoridade Munisípiu Kovalima, Miguel Armada Cardoso, reforsa katak treinamentu ne’e oinsá atu mellora kapasidade ezekusaun orsamentu tanba kada tinan aloka orsamentu ne’ebé mak boot ba implementasaun programa merenda eskolár.
“ Kada tina aloka orsamentu ne’ebé mak boot ba kada alunu iha direitu ba sentavu 42, presiza kontrola nia ezekusaun iha eskola tanba daudaun ne’e observa liuhusi ekipa monitorizasaun, nune’e ita nia atendimentu fasil lais no amigavel implementasaun PME tuir matadalan ne’ebé mak iha,”nia dehan.
Orsamentu Implementasaun programa Merenda Eskola 2026 ne’ebé aloka mai iha munisípiu Kovalima hamutuk $1,223.620 husi orsamentu ne’e aloka ba ensinu báziku $ 1.098,305 ho nia benefisiáriu 17,669 no orsamentu ba Ensinu pre-eskolár hamutuk $ 125.315 ho nia benefisiáriu hamutuk 2016.
Jornalista: Celestina Teles
Editor: Florencio Miranda Ximenes
