DILI, 23 Juñu 2026 (TATOLI)—Veteranu Cornelio Gama alias L7 hateten, nia parte sente triste ba antigu Prezidente Repúblika nia antigu FALINTIL, Francisco Guterres Lú Olo, nia falesimentu iha domingu (21 Juu 2026) hafoin Timor-Leste selebra aniversáriu restaurasaun independénsia ba da-24 (20 Maiu 2002-20 Maiu 2024).
“Ha’u sente triste banhira rona ha’u-nia amigu Francisco Guterres Lú Olo laiha ona iha mundu ida-ne’e, hanesan amigu iha ai-laran durante funu ne’e ramata. Entaun, ami FALINTIL husi tinan 1975 to’o 1999, ami-nia sentimentu hanesan lakon ona ami-nia maun Lú Olo banhira funu ramata,” Cornelio Gama L7 dehan ba jornalista sira iha maktoban nia rezidénsia iha Faról, ohin.
Aleinde ne’e, nia dehan, veteranu sira hakarak entrega podér ba jerasaun foun sira atu bele ukun nasaun ne’e ho responsabilidade.
“Ami-nia hakarak mak entrega podér ba oan sira atu bele ukun nasaun ida-ne’e ho responsabilidade. Ami ba ospitál mós ami-nia hanoin mak ami ne’e tinan to’o ona. Ami-nia vizaun mak ne’e, ami lakohi oan sira fahe malu, tenke fiar malu. Tanba podér nasaun entrega ba ita-boot sira. Ukun to’o rohan mak ne’e ona,” nia dehan.
Nia husu ba jerasaun foun sira katak veteranu sira hela uitoan ona, tanba ne’e husu atu nafatin banati veteranu sira-nia espíritu luta atu luta kombate mukit no liberta povu husi ki’ak liuhusi eskola no eskola nafatin.
“Ami hela de’it oituan ona, tinan tuir mai balun sei dehan katuas sira mai husi ai-laran ne’e mesak ona. Maromak dehan mai husi rai sei fila ba rai. Ha’u husu ba oan sira imi hadomi malu, fiar malu, hanoin eskola matenek. Nasaun Timor ne’e kiik liu iha mundu rai klaran. Ne’ebé Lú Olo hanesan komandante nasaun nian ne’ebé ohin ita lakon ne’e planu Maromak nian dehan katak tempu to’o ona tenke ba ona,” nia dehan.
Jornalista : Felicidade Ximenes
Editór : Cancio Ximenes
