Dionísio atualiza misaun ONU ba Xefe Estadu no konsidera Lú Olo nu’udar líder onestu
DILI, 24 Juñu 2026 (TATOLI)-Reprezentante permanente Timor-Leste ba Organizasaun Nasaun Unida (ONU) iha Nova Iorke, Embaixadór Dionísio Babo Soares, atualliza misaun iha Organizasaun Nasaun Unida ba Xefe Estadu, José Ramos-Horta.
Dionísia hateten katak nia mai Timor-Leste tanba iha asuntu família nian iha ne’ebé nia inan rasik mate ho ida-ne’e mak nia parte aproveita hodi kumprimenta Prezidente Repúblika atu hato’o relatóriu kona-ba servisu misaun permanente ONU ne’ebé halo durante tinan ida-ne’e.
“Ha’u mós hato’o relatóriu kona-ba nivel alkansu ne’ebé ita-nia misaun halo hodi eleva Timor-Leste nia profile internasionamente, liuliu iha ONU”, Dionísio Babo hateten iha Bairu Pité, Dili, ohin.
Nia esplika katak Misaun Permanente iha ONU durante ne’e aposta iha pontu tolu kona-ba visibilidade, kredibilidade no ser repeitadu iha Nasaun Unida.
“Nivel traballu ne’ebé ami la’o sente katak iha alkansu ne’ebé di’ak tebes nomós asuntu ne’ebé ko’alia iha relasaun kona-ba ita-nia preparasaun ba High Level Political Week ne’ebé sei halo iha Setembru mai”, nia informa.
Aleinde ne’e, aprezenta mós kona-ba situasaun politika internasionál ne’ebé akontese daudaun, funu entre nasaun sira iha Médiu Oriente hamutuk ho nasaun boot sira hanesan Amérika no sira seluk ne’ebé presiza mós Timor-Leste hanesan país ki’ikoan ida oinsá bele pozisiona nia an perante forsa internasional sira ne’e no pozisaun saida mak Timor-Leste hola hanesan membru Nasaun Unida para respeita nafatin UN Charter, Konvensaun Internasionál, Rezolusaun Internasionál ho mós valór no prinsípiu demokrátiku nu’udar timoroan.
“Ha’u pesoalmente hamutuk ho Misaun Permanente Timor-Leste iha Nove Iorke. Ha’u fila mai to’o iha dalan mak ha’u rona informasaun katak ita-nia eis-Prezidente Francisco Guterres Lú Olo iis kotu. Ami lori Familia no Komisaun Permanente Timor-Leste hakarak hato’o ami-nia profunda kondolénsia no sentidu peáar ba família enlutada”, nia dehan.
Nia dehan antigu Prezidente Repúblika Francisco Guterres nia mate ne’e lakon ida, tanba nia ema ida ne’ebé fó nia vida tomak ba nasaun ida-ne’e, luta durante tinan 24 iha ai-laran.
Tuir nia, maktoban Lu Olo ema ida depoizde ukun-an serbí hanesan líder ida ne’ebé umilde, onestu no kaer metin tebes valór no prinsípiu sosiedade nian, respeita lei, klaru ho diferensa pólitika ne’ebé iha, maibé nia mostra katak nia ema ida ne’ebé defende tebes Timór no interese ba rai ne’e.
“Tanba ne’e, ba Prezidente Lú Olo ha’u triste tebes, la menta tebes nia pasajen. Sentidu kondolénsia ba nia família no ba partidu FRETILIN nomós nu’udar eis-Prezidente ida ne’ebé hadomi tebes rai ida-ne’e”, nia dehan.
Jornalista: Arminda Fonseca
Editora: Maria Auxiliadora
