DILI, 24 Juñu 2026 (TATOLI)—Governu liuhusi Vise-Primeiru-Ministru, Ministru Kordenadór Asuntu Sosiál no Ministru Dezenvolvimentu Rurál no Habitasaun liuhusi Gabinete Apoiu Sosiedade Sivil (GASC) fó apoiu ba Klinika Bairru Pite ho orsamentu rihun $190 atu konstrui laboratóriu foun.
Projetu ida ohin lansa ne’e, nia dehan, ida-ne’e ba laboratóriu Ray-X nian ne’ebé mak Governu fó apoia.
“Sira promete katak obra ne’e sei ramata iha fulan haat nia laran, tanba ne’e ami fó apoiu tomak. Tanba planu no proposta ne’e sira mak hato’o depois mak GASS aprova finál ne’e GASC mak determina,” Kordenadór Gabinete Apoiu Sosiedade Sivil (GASC), Joaquim da Costa Freitas, hateten ba jornalista sira iha klínika Bairru Pite, ohin.
Nia relata, projetu ohin lansa ne’e, ba oin hahú halo konstrusaun, nune’e bele halo atendimentu di’ak ba komunidade.
“Husi projetu ne’ebé ohin lansa ne’e Governu apoiu hodi hadi’a ba oin sira bele halo atendimentu ne’ebé mak di’ak liu profisionál no mós iha kualidade,” nia informa.
Tuir nia, planu ida-ne’e realiza tanba iha diskusaun ne’ebé mak iha tinan kotuk liuhusi Komité Revizaun Orsamentu (KRO) no Primeiru-Ministru mak halo orientasaun, nune’e halo parseria ho klinika Bairru Pite.
Ne’ebé, tuir nia, apoiu ida-ne’e la’ós ba konstrusaun de’it maibé apoiu klínika Bairru Pite ne’e komesa husi atividade operasionál ho mós kondisaun sira-ne’ebé mak sira presiza, Governu apoiu atu bele halo atendimentu ne’ebé di’ak.
Iha fatin hanesan, Prezidente Fundasaun Klinika Bairru Pite, Inácio dos Santos, informa ohin halo lansamentu projetu faze daruak, iha tinan kotuk, Gabinete Apoiu Sosiedade Sivil apoia orsamentu mak halo moru protesaun ba Klínika Bairru Pite.
“Iha tinan ne’e, GASC kontínua apoiu halo melloramentu ba fasilidade saúde mak ita halo konstrusaun foun ba fasilidade saúde laboratóriu ho Ray-X nia fatin. Ohin, ita halo lansamentu projetu foun laboratóriu no Ray-X no projetu ne’e nia durasaun ba fulan haat de’it,” Inácio dos Santos hateten.
Nia esplika, empreza ne’ebé responsabiliza ba obra ne’e nafatin mak Empreza Gaerenez Unip. Lda, ne’ebé mak kaer projetu halo moru ba klínika Bairru Pite iha iha tinan kotuk no sira mak kontínua kaer projetu refere.
“Ita fiar katak ho melloramentu fasilidade laboratóriu ita sei iha fasilidade ida-ne’e ho sufisiente para bele halo teste ne’ebé mak ho di’ak, tanba antes ne’e sira halo teste de’it iha kontainer kiik ida no pesoál radiolojista sira husu atu hadi’a fatin tanba ida-ne’e fó risku ba sira-nia saúde. Tanba ne’e, ohin, klínika Bairru Pite realiza duni mehi espera katak ho laboratóriu ne’ebé mak iha bele halo melloramentu ne’ebé di’ak-liu iha futuru,” nia dehan.
Aleinde ne’e, na’in ba Empreza Gaerenez Unip. Lda, Delia de Araujo de Jesus, sente orgullu tanba kontinua hetan konfiansa husu klínika Bairru Pite atu kontinua kaer projetu ida-ne’e, tanba ne’e empreza garante katak projetu ne’e sei ramata tuir kontratu ne’ebé mak iha.
“Tanba antes ne’e ami mak kaer obra ida-ne’e, ami mak halo no antes fulan haat ami entrega kedas ona. Tanba ne’e, ami nafatin hetan konfiansa husi klinika, ami garantia ba fulan haat nia laran,” Delia de Araujo de Jesus dehan.
Nia hateten, projetu ne’e Empreza kontaktu traballadór barak loos, atu bele kontrola projetu ne’e bele la’o tuir nia tempu.
“Ami hakarak projetu ne’e hotu lalais, tanba ne’e iha traballadór barak mak servisu. Traballadór sira-ne’e timoroan hotu, husi empreza ne’e mós timoroan hotu, tanba sira garantia projetu ne’e la’o tuir kontratu refere,” nia hateten.
Jornalista : Felicidade Ximenes
Editór : Cancio Ximenes
