DILI, 24 Juñu 2026 (TATOLI)—Kolombia avansa ba faze 32 Kopa Mundiál 2026, hafoin halakon Repúblika Demokrátika Kongo (RD Kongo) iha faze grupu iha Grupu K ho golu mihis 1-0, iha Estádiu Guadalajara, Zapopan, kuarta (14 Juñu 2026) meiudia oras Timor-Leste.
Husi rezultadu ne’e lori Kolombia rekolla pontu neen (6) no Portugál okupa iha fatin daruak ho pontu haat (4). Kolombia no Portugál mak sei iha oportunidade atu avansa ba jogu tuir mai, enkuantu Kongo iha oportunidade mihis tebes no Uzbekistan hein de’it atu kompleta de’it jogu.
Bainhira jogu la’o iha primeira parte, Kongo halo surpreza ba uma-na’in hodi ameasa iha minutu dahuluk liuhusi jogadór E Kayembe. Maibe, nia suta husi li’ur área penalidade sai dook.
Liutiha minutu tolu, Kolombia hetan oportunidade atu marka uluk golu maibé jogadór kolombianu Daniel Munoz nia suta bola ne’e semo dook husi baliza Kongo nian, ne’ebé guarda husi guarda-rede Lionel Mpasi.
Kolombia iha oportunidade hodi hakat liu baliza Kongo nian liuhusi Daniel Munoz. Maibé, árbitru la permite golu hafoin hetan katak defeza Crystal Palace nian iha offside.
Iha minutu 11, Kolombia kontinua halo presaun. Maske nune’e, James Rodrigues nia suta ne’ebé maka’as hetan blokeiu husi guarda-rede Kongo nian, Lionel Mpasi. Kolombia iha tan oportunidade minutu balun liutiha maibé guarda-rede Lionel Mpasi mantén nafatin.
Baliza Lionel Mpasi halo salvasaun ida tan hafoin hasoru jogadór kolombianu Gustavo Puerta suta bola ida ho distánsia dook.
Kolómbia fila-fali ba joga ho agresivu hafoin Pauza Hidratasaun nian. Maibé, sira-nia atake la konsege prodús golu ida.
Iha minutu 42, jogadór Kongo hetan oportunidade iha baliza kolombianu nia oin. Maske nune’e, sira-nia atake ne’e salva husi guarda-rede kolombianu Camilo Vargas.
Kolombia kontinua halo presaun ba baliza Kongo nian antes intervalu. Maibé, James Rodrigues ho nia kolega sira-nia esforsu mós saugate de’it no primeira parte ramata ne’e nafatin ho rezulatdu 0-0.
Kolombia kontinua avansa iha inísiu segunda parte. Iha minutu 50, jogadór Luis Dias hetan tan oportunidade ida iha kaixa penalidade, maibé nia suta bola ladun maka’as entaun guarda rede husi Kongo Lionel Mpasi salva bola ho lalais.
Iha minutu 52, jogadór Kongo sira halo atake hasoru defeza Kolombiana maibé esforsu sira husi ekipa ne’ebé koñeseidu ho naran Les Leopards la fó rezultadu.
Kolombia koko atu joga ho pasiénsia liután hodi kria oportunidade sira, maske nune’e ekipa Nestor Lorenzo nian luta nafatin hodi penetra defeza adversáriu nian. Entretantu, guarda rede Kongolés Lionel Mpasi mós joga ho sólidu iha baliza.
Ho jogu ne’ebé agresivu, Kolombia ikus mai halakon impase iha minutu 76. Daniel Munoz halakon impase ho suta ida-ne’ebé mak dezvia husi adversáriu nia ain, hodi halo guarda-rede Lionel Mpasi tuda-an ba fatin sala no la konsege asegura bola, nune’e golu 1-0 ba Kolombia.
Liutiha minutu balun, jogadór Kongo sira halo fali kontra-atake hodi marka golu, maibé Luis Dias nia golu la permite tanba jogadór Bayern Munique nian konsidera hanesan offside.
Jogadór Kongo sira muda ba jogu agresivu hafoin senye lakon. Maibé, iha tempu ne’ebé restu, jogadór Kongo sira la konsege hatán no vitória ba Kolómbia 1-0.
Jogadór husi Kolombia
Camilo Vargas; Daniel Munoz, Davinson Sanchez, Jhon Lucumi, Johan Mojica; Gustavo Puerta, Jefferson Lerma, John Arias; James Rodriguez, Luis Suarez, Luis Diaz.
Jogadór husi DR Kongo
Lionel Mpasi; Arthur Masuaku, Axel Tuanzebe, Steve Kapuadi, Chancel Mbemba, Aaron Wan-Bissaka; Edo Kayembe, Samuel Moutoussamy, Ngalayel Mukau; Cedric Bakambu, Yoane Wissa.
Jornalista : Hortêncio Sanchez
Editór : Cancio Ximenes
