DILI, 24 Juñu 2026 (TATOLI)—Parlamentu Nasionál, kuarta ne’e, aprova votu pezár ho unanimidade ba Saudozu Francisco Guterres Lú Olo.
Notísia Relevante: PM Xanana orienta Assanami haloot Lú Olo ho dignu
“Parlamentu Nasionál aprova votu pezár ne’e ho votu a-favór 63, kontra zero (0) no abstensaun zero (0),” Prezidente Pralamentu Nasional, Fernanda Lay, hateten iha plenária Parlamentu Nasionál.
Antigu Prezidente Repúblika no Prezidente Partidu FRETILIN, Francisco Guterres, hakotu iis iha Domingu ne’e ho idade 71 iha Ospitál Prince Court, Kuala Lumpur, Malázia, hafoin halo tratamentu saúde intensivu.
Saudózu Francisco Guterres Lú Olo moris iha Postu Administrativu Ossu, Munisípiu Viqueque, iha loron 07 fulan-Setembru tinan 1954. Nia nu’udar oan-mane husi Félix Guterres no Elda da Costa Guterres. Nia oan ba dala hitu iha família maun-alin hamutuk na’in-ualu.
Lú Olo kaben ho Cidália Lopes Nobre Mouzinho Guterres, no sira iha oan na’in haat (4) mak hanesan Francisco Cidalino Guterres, Eldino Nobre Guterres, Felezito Samora Nobre Guterres, no Dália Luliana Nobre Guterres.
Francisco Guterres Lú Olo nu’udar funu-na’in ida-ne’ebé la kolen ba kauza independénsia nasionál, dedika nia-an lahó rezerva ba frente husi tinan 1974 to’o tinan 2000. Nia pertense ba grupu restritu no istóriku ho de’it komandante na’in-haat ne’ebé hela ininterrompe iha ai-laran durante tinan 24 iha rezisténsia armada hasoru okupasaun Indonézia.
Ho restaurasaun ofisiál independénsia iha loron 20 fulan-Maiu tinan 2002, Asembleia Konstituinte sai hanesan Parlamentu Nasionál Timor-Leste nian. Lú Olo kontinua nia kargu aas no hala’o knaar nu’udar Prezidente Parlamentu Nasionál dahuluk durante Primeira Lejizlatura tomak, hodi hanaruk nia mandatu to’o loron 31 fulan-Jullu tinan 2007.
Renomeadu hanesan restauradór boot ida ba independénsia Repúblika Demokrátika Timor-Leste nian, ninia asinatura no lideransa grava iha fundasaun nasaun joven nian, husik hela legadu indelével ida kona-ba diplomasia, reziliénsia no domin ba pátria.
Francisco Guterres Lú Olo hetan eleitu demokrátiku husi povu nu’udar Prezidente Repúblika Demokrátika Timor-Leste ba mandatu tinan 2017 to’o 2022. Hafoin konkluzaun mandatu nu’udar Xefe Estadu, Francisco Guterres Lú Olo hala’o kna’ar inerente nu’udar membru Konsellu Estadu to’o mate.
Jornalista : Felicidade Ximenes
Editór : Cancio Ximenes
