VIKEKE, 25 Juñu 2026 (TATOLI)—Prezidente Autoridade Munisípiu (PAM) Vikeke no Konsellu Kombatente Libertasaun Nasionál (CCLN-sigla portugeza) organiza misa requiem ba Antigu Prezidente Repúblika (PR), Francisco Guterres ‘Lú Olo’ hodi fó omenajen ikus no hasa’e orasaun ba saudozu.
Iha misa requiem ne’e, Selebrante Pe. Tomás de Aduino L. de Cruz, haktuir liuhusi misa ida-ne’e povu Vikeke hamutuk hodi reza ba saudozu Francisco Guterres ‘Lú Olo’ ne’ebé husik ona mundu nune’e iha momentu ne’ebé lutu, triste laran susar presiza hasa’e orasaun ba Maromak.
“Tanba ita lakon ona ita-nia eroi boot ida hanesan ema luta na’in-ida, aman ida, timoroan di’ak ida, iha ita-nia rain doben Timor-Leste. Ita moris iha mundu ida-ne’e ita hotu-hotu la’o hasoru mate, ne’ebé sai dalan ikus ba ita. Ita lahatene mate bainhira no mate iha-ne’ebé, mate oinsá. Tan ne’e, ita hanoin fali Saudozu Lú Olo dezde nia moris mai fó nia kontribuisaun tomak ba povu no nasaun ida-ne’e,” Pe. Tomás hateten iha nia omília iha igreja Nossa Senhora Imaculada Vikeke Vila, Kinta ne’e.
Amlulik ne’e relembra fali iha tinan 24 iha funu rezisténsia hasoru buat oioin, terus, susar no lakon buat hotu-hotu iha moris tomak, maibé Saudozu Lú Olo kontinua eziste hodi lori rai no povu ida-ne’e ba moris iha liberdade, moris iha ukun rasik nian laran.
“Hafoin ita manán tiha independénsia, Saudozu Lú Olo kontinua fó nia kontribuisaun no nia domin tomak ba konstrusaun nasaun ida-ne’e durante tinan 24. Ita haree ita-nia aman nia kontribuisaun tomak ne’ebé fó hanoin fali mai ita hotu katak espíritu sakrifísiu, patriotizmu, nasionalizmu no nia dedikasaun tomak ba rai ida-ne’e, la sura nia kolen, la sura nia terus no susar sira. Nune’e, liuhusi eukaristia ida-ne’e ita fó agradesimentu ba saudozu nia kontribuisaun ba nasaun Timor-Leste. Ohin ita halibura hamutuk hodi reza ba ita-nia aman eroi boot nian klamar, maski ita labele partisipa diretamente ninia fúnebre,” nia subliña.
Hafoin misa ramata, Prezidente CCLN Munisípiu Vikeke, Adriano Câmara ‘Lentil’, sente triste tanba lakon ona saudozu Francisco Guterres ‘Lú Olo’, tan ne’e Autoridade Vikeke no CCLN organiza misa ida-ne’e hodi konvida ema hotu-hotu hodi tau hamutuk lilin no ai-funan lori bá igreza hodi husu misa ba saudozu.
“Nune’e, lilin no ai-funan sira-ne’ebé hetan bensaun husi amu selebrante, depoiz ida-ne’e ita kontinua lori bá Dili hamutuk ho Prezidente Autoridade Munisípiu Vikeke no CCLN,” nia informa.
Iha fatin hanesan, Reprezenta Sarani Vikeke, Idalina Maria Maia, sente triste bainhira lakon figura Antigu PR Lú Olo ho distánsia ne’ebé dook nune’e liuhusi misa ida-ne’e hodi hato’o omenajen ikus ba saudozu.
“Kona-ba memoria sira-ne’ebé saudozu husik hela ba ita, orgullu ida ba Vikeke-oan sira. Saudozu nia moris tomak dedika an ba rai ida-ne’e. Saudozu la hamutuk ona ho ita, maibé nia istória sei moris iha Timor-Leste,” nia dehan.
Hafoin misa ramata, sarani no Autoridade Munisípiu no Veteranu kontinua lori bandeira, lilin no ai-funan ba iha sede Partidu FRETILIN hodi prepara dezloka bá Dili.
Entretantu, misa ne’e partisipa direta husi Prezidente Autoridade Munisípiu Vikeke, Autoridade Lokál, Polísia Nasionál Timor-Leste (PNTL) Munisípiu Vikeke, veteranu, funsionáriu, profesór no estudante sira.
Jornalista: Vitorino Lopes da Costa
Editór: Xisto Freitas da Piedade
