DILI, 25 Juñu 2026 (TATOLI)—Governu liuhusi desizaun Konsellu Ministrus aprova ona projetu Rezolusaun Governu, ne’ebé aprezenta husi Vise-Ministra Finansas, Regina de Jesus, kona-ba kompozisaun Komité Revizaun Polítiku ba prosesu preparasaun Orsamentu Jerál Estadu (OJE) ba tinan 2027.
Komité Revizaun Polítiku iha objetivu atu garante katak planu anuál husi servisu no entidade Setór Públiku Administrativu viavel no aliñadu ho prioridades nasionál ne’ebé estabelese iha Planu Estratéjiku Dezenvolvimentu tinan 2011-2030, iha Programa Governu, iha planu tempu médiu no dokumentu estratéjiku sira seluk.
Primeiru-Ministru Interinu, Mariano Assanami Sabino, hateten ohin iha reuniaun Konsellu Ministru aprova de’it proposta kona-ba Komisaun Revizaun Orsamentu (KRO) hodi haree kona-ba Orsamentu Jerál Estadu (OJE) ba kada tinan.
“Ohin, ami aprova komisaum ida ne’e maibé iha diferensa tanba aumenta tan Komisaun Funsaun Públiku (KFP) ba komisaun KRO nian, ho objetivu atu haree mós ba ajustamentu tabela salariál,” Xefe Governu interinu informa ba jornalista sira iha Ministériu Finansa, Aitarak laran, ohin.
Komité ne’e mós iha responsabilidade atu asegura katak dotasaun orsamentál ne’ebé atribui tuir planu hirak ne’e no limite másimu ba despeza ne’ebé define ona, no mós garante katak inkluzaun dotasaun iha Orsamentu Jerál Estadu depende ba inskrisaun prévia husi ninia atividades iha planu servisu anuál ka entidade sira-ne’e.
Aleinde Komité Revizaun Polítiku ne’e sei prezide husi Primeiru-Ministru no kompostu mós husi Vise-Primeiru-Ministru rua, Ministra Finansa, Ministru Obra Públika no Ministru Planeamentu no Investimentu Estratéjiku.
Enkuantu Sekretária Estadu Igualdade, Prezidente Institutu ba Defeza Direitu Labarik no reprezentante ida hosi Asosiasaun Defisiente Timor-Leste mós sei partisipa iha sorumutu Komité Revizaun Polítiku nu’udar observadór.
Jornalista : Alexandra da Costa
Editór : Cancio Ximenes
