DILI, 25 Juñu 2026 (TATOLI)–Primeiru-Ministru, Kay Rala Xanana Gusmão, akompaña ekipa delegasaun hala’o vizita ba Fundasaun Mário Soares iha Lisboa, hodi hametin valór demokrásia no memória istórika.
Durante vizita ne’e, PM Xanana fó valór aas ba kontribuisaun Mário Soares nian ba prosesu demokratizasaun iha Portugál, liuliu papél importante iha Revolusaun 25 Abril, ne’ebé ajuda hasai Portugál husi sistema ditadura militár no kontribui ba reestabelesimentu demokrasia iha país ne’e.
Primeiru-Ministru, Kay Rala Xanana Gusmão, subliña katak Mário Soares nu’udár figura istórika importante ida iha luta ba liberdade, demokrasia no direitu umanu no nia kontribuisaun sai referénsia globál ba nasaun sira-ne’ebé sei dezenvolve sistema demokrátiku.
“Nune’e vizita ba Fundasaun Mário Soares hanesan oportunidade importante atu aprende husi istória polítika Portugál nian, liuliu kona-ba prosesu tranzisaun demokrátiku no konsolidasaun instituisaun Estadu,” PM Xanana hateten.
Xefe Governu dehan, Mário Soares ho nia kaben mós hanesan figura polítika sira-ne’ebé sempre defende liberdade, demokrasia no dignidade umana, no sai inspirasaun ba lideransa sira iha mundu tomak.
“Inisiativa ne’e sei kontribui ba formasaun intelektuál no konsiénsia sosiál jerasaun foun Timor-Leste nian, liuliu iha komprensaun kona-ba valór demokrátiku sira,” PM Xanana hateten.
Tamba ne’e, líder polítiku ne’e sente kontente tebes bele vizita Fundasaun Mário Soares ne’ebé prezerva memória istórika no kontribui ba edukasaun sívika no demokrátika.
Enkuantu durante vizita ne’e, Fundasaun ne’e mós entrega livru lubuk ida ba delegasaun Timor-Leste, ne’ebé sei tau iha Xanana Reading Room, hodi permite sidadaun Timor-Leste sira bele asesu bá literatura no dokumentu sira relasiona ho demokrasia, istória no governasaun.
Jornalista : Alexandra da Costa
Editór : Cancio Ximenes
