DILI, 25 Juñu 2026 (TATOLI) – Maski oras hatudu ona tuku hitu kalan, komunidade atus ba atus husi munisípiu, grupu no organizasaun oioin sei kontinua mai rezidénsia saudozu eis Prezidente Repúblika, Francisco Guterres Lú Olo, iha Farol, Dili, atu presta omenajen ikus ba lider nasional ida-ne’ebé dedika nia moris tomak ba luta ukun-rasik-an no dezenvolvimentu Timor-Leste.
Observasaun TATOLI husi tuku neen lorokraik to’o tuku hitu kalan hatudu katak ema atus ba atus kontinua troka malu tama no sai husi mate uma. Iha sorin seluk, liña formatura sei naruk, no balun tenke hein minutu 30 no balun to’o oras ida resin antes tama atu halo orasaun no hato’o respeitu ikus ba saudozu.
Maski hein kleur, la iha ida husi komunidade sira ne’ebé hatudu kolen ka lakohi hein. Ba sira, tempu ne’ebé uza atu hein la boot liu sakrifísiu no servisu ne’ebé Lú Olo halo ba povu no nasaun durante nia moris.
Reprezentante Komunidade Grupu Arte Moris, Evangelinho Manuel Perreira, hateten katak nia hamutuk ho maluk sira husi komunidade arte mai presta omenajen tanba sente lakon boot ida ba Timor-Leste.
Notisia relevante : Xanana Gusmão hato’o sentidu kondolénsia ba falesimentu Saudozu Francisco Guterres Lú Olo
“Ami husi Arte no kolega sira Arte Timor ohin loron ami mai presta omenajen iha ne’e. Ami sente lakon tebes aman no avó ida ne’ebé laran luak no hadomi tebes nia povu. Ami husi komunidade arte hakarak mai hola parte hato’o sentidu ikus ba ita nia lider no ita nia luta,” dehan Evangelinho ba TATOLI.
Hanesan mos komunidade Caicoli, Joselina Carla, dehan lakon Saudozu Lú Olo sai triste boot ba povu Timor-Leste tanba nia konsidera hanesan lider ida ne’ebé iha justisa no sempre hadomi nia povu.
“Ami sente triste lakon lider importante ida ba ita nia rai. Ami mai hein ona husi lorokraik no agora ba kalan ona, maibé ida ne’e la boot liu saida mak ita nia erói sira halo ona ba ita. Nia mak ema ida ne’ebé justu no hadomi nia povu,” hateten Joselina.
To’o kalan ona maibe movimentu komunidade seidauk menus no kontinua mai husi fatin oioin atu fó respeitu ikus ba Francisco Guterres Lú Olo, ne’ebé durante nia moris sai símbolu rezisténsia, unidade no servisu ba povu Timor-Leste.
Jornalista : Cidalia Fátima
Editora : Armandina Moniz
