DILI, 25 Juñu 2026 (TATOLI)—Sekretária Estadu Formasaun Profisionál no Empregu (SEFOPE) liuhusi Diretór Dirasaun Nasionál Empregu Estranjeiru, João Correia, informa SEFOPE simu ona informasaun kona-ba traballadór timoroan, Idelfonso Saturnino dos Santos mate iha Korea tanba hetan asidente tráfegu (soke malu ho karreta) iha provinsia Geongido Whaceong Tebudo Korea.
Traballadór ne’e hetan asidente bainhira kondús hela viatura (motor) atu ba servisu maibé to’o dalan klaran maizumenus tuku 06h30 dadeersan hetan asidente xoke malu ho karreta hodi rezulta nia lakon vida no agora daudaun asegura hela iha ospitál.
“Tuir informasaun ne’ebé ha’u simu, matebian iha momentu ne’ebá lori motor ba servisu fatin, depois nia fila-fali ho motor ba uma atu foti buat ruma ne’ebé nia haluha, maibé iha dalan, kruzamentu akontese xoke entre motor ne’ebé nia lori ho veíkulu ida,” Diretór ne’e informa ba Agência Tatoli liuhusi telefónika, ohin.
Nia informa, prosesu investigasaun sei hala’o hela husi autoridade polísia Korea Súl atu determina kronolójia kompleta no responsabilidade kona-ba asidente ne’e. Bainhira investigasaun ramata, autoridade kompetente sei fó informasaun ofisiál ba parte relevante inklui Embaixadór.
“Traballadór ne’e ba servisu iha Korea iha 28 Fulan-Fevereiru 2022 liuhusi programa empregu ba traballadór estranjeiru. Durante tinan tolu resin, matebian servisu iha kompanhia Hyunsusan, neʼebé lokaliza iha area Seocheon-gun, Provincia Chungcheongnam-do,” nia relata.
Maibé, nia hatutan, iha fulan-Outubru 2025, matebian sai husi sistema empregu anteriór no hahú servisu fali iha kompañia Songbeksusan, neʼebé lokaliza iha area Daebudo, Provinsia Gyeonggi-do, to’o akontese kazu asidente ne’e.
Traballadór ne’e nia naran kompletu Idelfonso Saturnino dos Santos, moris iha Baukau iha loron 06 Jullu 1993. Matebian mai husi família ne’ebé iha maun alin na’in-ualu (8) ne’ebé kompostu husi mane na’in-haat (4) no feto na’in-haat (4) no nia mak mane boot iha família.
Nia inan naran Inacia, agora sei moris hela, no nia aman naran Paul dos Santos (matebian) mate iha tinan 2019. Nia kaben-na’in no iha oan feto ida (1).
Jornalista : Alexandra da Costa
Editór : Cancio Ximenes
