DILI, 25 Juñu 2026 (TATOLI) – Kuaze traballadór timoroan 50 ne’ebé hela no servisu iha Austrália aproveita tempu feriadu fila mai Timor-Leste no halibur hamutuk hodi ba presta omenajen ikus ba saudozu eis Prezidente Repúblika, Francisco Guterres Lú Olo, iha rezidénsia Farol, Dili.
Reprezentante traballadór timoroan, Aderito Freitas de Souza, hateten komunidade traballadór sira sente lakon boot tanba Timor-Leste lakon lider ida ne’ebé durante nia moris hatudu dedikasaun no sakrifísiu boot ba libertasaun no dezenvolvimentu nasaun.
“Nu’udar sentimentu traballadór timoroan iha Austrália, ami sente lakon ema ida ne’ebé hatudu nia dedikasaun no sakrifísiu ba rai ida ne’e durante luta naruk. Nia ema simples, laran di’ak no hadomi nia povu hotu. Tanba ne’e, maski ami servisu iha rai liur, ami mos sente lakon ami nia luta nain no erói ida,” dehan Aderito.
Nia esplika katak oportunidade sira ne’ebé traballadór timoroan ohin loron hetan iha rai liur la bele haketak husi sakrifísiu jerasaun rezisténsia sira ne’ebé luta atu Timor-Leste hetan independénsia no bele estabelese relasaun di’ak ho nasaun sira seluk.
“Ami hetan oportunidade ida ne’e liu husi sira nia sakrifísiu. Timor-Leste bele halo relasaun bilateral ho rai sira seluk no ikus mai povu hetan benefísiu. Tanba ne’e, ami mai hato’o respeitu no presta omenajen ikus ba ami nia lider,” hateten tan.
Tuir Aderito, durante tinan 24 luta ba ukun-rasik-an, lider sira hanesan Lú Olo nunka sura kolen no kontinua sakrifika an ba povu no nasaun. Tanba ne’e, ohin loron povu ne’ebé hein oras ida ka rua atu presta omenajen la konsidera hanesan buat ida ne’ebé todan.
“Nu’udar timoroan, uluk sira luta durante tinan 24 no nunka sura kolen. Ohin ita mai hamriik hein oras ida ka rua de’it, ami povu mos nunka sente kolen,” dehan nia.
Observasaun TATOLI hatudu katak komunidade traballadór timoroan ne’ebé fila husi Austrália kontinua hamutuk ho komunidade atus sira seluk atu hato’o respeitu ikus ba Francisco Guterres Lú Olo, ne’ebé povu barak konsidera hanesan símbolu rezisténsia no lider ne’ebé dedika nia moris ba Timor-Leste.
Jornalista : Cidalia Fátima
Editora : Armandina Moniz
