DILI, 25 Juñu 2026 (TATOLI)–Veterana Madalena Bidau Soares ‘Kasian’, espresa nia sentimentu triste ba falesimentu Antigu Prezidente Repúblika, Francisco Guterres ‘Lú Olo’ no rekorda saúdozu nia komportamentu no personalidade.
“Sentimentu lakon tanba ema di’ak ida, ema ida hanesan ne’e ita atu hetan fali tan nia fatin susar para mate, tanba ikus ne’e ita hanoin la hanesan, balun buka ida-ne’e mak nakonu maibé la tuir povu nia hakarak. Maibé kona-ba ida-ne’e (Lú Olo), desde uluk nia komportamentu mak nunka halo a’at ema, nunka foti-an, nunka hatudu-an, katak nia mak matenek liu, nia mak boot liu, laiha. Nia ko’alia nia biasa de’it, defende povu nia direitu, defende ami feto nia direitu, defende prinsípiu ukun-an, nia halo buat di’ak, nia la halo a’at, ami rona laiha,” Madalena Bidau Soares bainhira lori estudante no profesór sira husi Eskola Kasian Likisá, hodi presta omenajen ba Saudozu Lú Olo, iha Rezidénsia Farol, Kinta ne’e.
Nia lembra, Lú Olo durante hanesan Prezidente Repúblika sempre defende feto inklui sidadaun kiik sira-nia direitu.
“Tanba ne’e mak hili nia ba Prezidente, ami feto kompaña hamutuk to’o iha Glenu ne’ebá tanba ami haree nia di’ak, tanba ne’e ami hili nia ba Prezidente Repúblika hodi defende duni ami feto nia direitu no sidadaun kiik nia direitu, mai ohin nia lakon ona, ita sente katak ida-ne’e hanesan nia ita buka mós susar oituan,” nia akresenta.
Notísia relevante : Veterana Kasian: “Lori ha’u-nia beik loke eskola ba labarik sira”
Veterana Kasian hatutan, Lú Olo nia mate laós família de’it mak sente lakon maibé ema hotu sente lakon.
“Sente lakon boot, tanba lakon ema di’ak ida ita sente ladiak, la’ós ami mesak mak lakon, ita hotu lakon,” nia tenik.
Veterana ne’e deskreve, durante iha ai-laran Lú Olo hanesan lutadór sira seluk ne’ebé iha Frente Armada maibé diferente iha nia hahalok.
“Nia luta hanesan ema hotu-hotu nia luta, ami hotu hanesan iha ne’ebá. Ninia komportamentu hanesan iha ai-laran di’ak to’o ohin loron. Nia hadomi ema, ko’alia ba ema ho respeitu, rona malu, nunka atu foti-an hasoru ema mós laiha, nia hanesan ema simples ida to’o ukun-an mós nia hanesan de’it,” nia konta tuir.
Jornalista : Natalino Costa
Editora : Julia Chatarina
