DILI, 26 Juñu 2026 (TATOLI) – Situasaun nakonu ho tristeza iha Kuartél Jerál FALINTIL-Forças de Defesa de Timor-Leste (F-FDTL) iha sesta dadeer, bainhira Kadaver Antigu Prezidente Repúblika Timor-Leste, Francisco Guterres Lú Olo, to’o hodi simu husi militar F-FDTL.
Maizumenus tuku 09:20 dadeer oras Timor-Leste, Kadaver tama iha Kuartél Jerál F-FDTL hafoin kompleta omenajen ikus iha Komite Sentral FRETILIN (CCF). Ema rihun resin halibur ona iha área ne’e antes kadaver to’o hodi asiste viajen ikus hosi figura ida ne’ebé dedika nia moris ba independénsia Timor-Leste nian.
Bainhira odamatan Kareta nian nakloke, soldadu F-FDTL hotu-hotu hamriik iha atensaun hodi fó sira nia onra militár ikus ba eis-Komandante-Jerál Forsa Armada nian. Iha formatura nia sorin, Saudozu nia feen no oan sira hamriik besik, sira nia oin nakonu ho tristeza.
Ambiente sai emosionál liután bainhira Xefe Estadu-Maior Jerál F-FDTL, Tenente-Jenerál Domingos Raúl “Falur Rate Laek” hato’o omenajen ikus, ho lian nakdedar no matan-been nakonu.
Falur haktuir katak ne’e Lú Olo nia vizita ikus ba fatin ne’ebé simboliza FALINTIL nia luta. Ho fuan ne’ebé todan, nia konvida ema hotu ne’ebé prezente atu fó respeitu ba figura ida ne’ebé iha nia moris tomak luta ba dignidade, justisa, no liberdade ba povu Timor-Leste.
Nia afirma katak Lú Olo nu’udar kuadru FALINTIL ida ne’ebé fiel, durante tinan 24 luta armada, nunka trai povu nia konfiansa. Ninia firmeza, espíritu ne’ebé la rende, no lealdade ba nasaun nia ideál sira hela ho nia to’o nia moris nia rohan.
Falur esplika, hafoin ukun-an, Lú Olo kontinua nia servisu. Nia kontinua nia luta liuhosi harii nasaun enkuantu kaer metin ba prinsípiu no valór sira dame nian, unidade nasionál, diálogu, no respeitu ba sidadaun ida-idak nia dignidade.
“Durante tinan 24 luta naruk no iha prosesu tomak desenviolvimentu nasional ita boot nunka trai povu nia konfiasa,” dehan Falur.
Falur husu ba família enlutada atu reziliente nafatin hodi hasoru lakon ida ne’e.
“Nia kompleta ona nia misaun iha rai no husik hela legadu ida luta nian ne’ebé tenki kontinua hosi nia família no hosi povu tomak Timor-Leste nian”, nia hatete.
Lori F-FDTL nia naran, Falur mós hato’o nia apresiasaun ba Lú Olo nia dedikasaun tomak ba nasaun.
“Adeus, maun, kamarada funu nian, patriota, no oan-mane di’ak liu hosi Timor-Leste. Ami sei proteje nafatin nasaun no família ne’ebé ita-boot husik hela”, nia hatete.
Entretantu, Ministru Defeza, Donaciano Costa Gomes Pedro “Klamar Fuik,” hato’o sentidu kondolensia profundu ba matebian nia família lori Ministériu Defeza no soldadu F-FDTL tomak nia naran.
Nia dehan, Lú Olo nia mate ne’e hanesan lakon boot ida ba nasaun, tanba nia la’ós de’it hala’o kna’ar nu’udar Prezidente Repúblika maibé nu’udar mós kamarada funu nian ne’ebé dedika nia vida tomak hodi serbí nasaun.
“Ami reza atu nia deskansa ho hakmatek. Memória Lú Olo nian sei moris nafatin iha ami nia fuan no halo parte iha istória nasaun Timor-Leste nian,” dehan Donaciano.
Hafoin onra militár sira konklui, iha presizamente tuku o9:35 dadeer oras Timor-Leste, kadaver sai hosi Kuartél Jerál F-FDTL no ba Palásiu Prezidensiál hodi kontinua omenajen ikus onra estadu.
Ema rihun ba rihun hela iha estrada ninin, hodi despede, enkuantu sira seluk hakruuk ulun iha orasaun, hodi akompaña saída funu-na’in loloos ida ne’ebé dedika nia moris ba independénsia, unidade, no futuru Timor-Leste nian.
Jornalista : Cidalia Fátima
Editora : Armandina Moniz
