DILI, 26 Juñu 2026 (TATOLI)—Jogu entre Estadu Unidu Amerika (EUA) ho Turkia hanesan jogu ikus grupu D ne’ebé hala’o iha Estádiu Los Angeles sesta meiudia, Turkia konsege hatudu prestaun di’ak hodi manán 3-2, maibé nafatin elemina husi faze grupu Kopa Mundiál 2026.
Bainhira jogu hahú, Estadu Unidu hetan kedas vantajen iha minutu tolu jogu nian liuhosi golu Auston Trusty nian.
Turkia hatán iha minutu 10. Arda Guler marka golu empata nian hafoin kapitaliza iha redusaun ida hosi Alper Yilmaz.
Estadu Unidu marka fali golu iha minutu 29 liuhosi Mark McKenzie. Maibé, nia golu la hetan permisaun hosi jogadór liña nian ne’ebé mak hasa’e ona bandeira ofside nian.
Turkia, iha nia fatin, aumenta tan golu ida iha minutu 31. Orkun Kokcu, dala ida-ne’e hetan rede nia kotuk hasoru EUA.
Kokcu remata pasajen ida-rua hosi liña atake Turkia nian iha flanku karuk ho tap-in iha baliza nia oin. Ekipa vizitante hetan vantajen 2-1, ne’ebé maka sai nafatin pontu iha intervalu.
Estadus Unidus halo empata iha segunda parte, iha minutu 48. Sebastian Berhalter marka golu.
Berhalter soe bola ne’ebé namlele besik kaixa penalidade nian. Bola ne’e tun liu guarda-rede no tama ba rede. Eskore agora 2-2.
EUA kontinua baku defeza Turkia, maibé defeza ne’ebé maka’as impede ekipa uma-na’in atu marka golu. Ekipa uma-na’in sofre iha tempu adisionál nian.
Kaan Ayhan marka golu manan Turkia nian ho tap-in husi Can Uzun nia asisténsia. Turkia manan ho 3-2 hasoru Estadus Unidus.
Duelo maka’as ne’e kontinua to’o minutu ikus sira. Turkia, ho presaun barak liu, konsege hatama golu liuhosi suta besik Kaan Ayhan nian iha tempu lezaun nian.
Turkia ikusmai sai ho pontu tolu maski hetan eliminasaun hosi Kopa Mundiál 2026. Entretantu, EUA mantein metin iha klasifikasaun nia leten ho pontu neen, nune’e, EUA no Australia mak kualifika ba jornada 32.
Jogadór Turkia
Ugurcan Cakir; Zeki Celik, Ozan Kabak, Abdulkerim Bardakci, Evren Elmali; Orkun Kokcu, Salih Ozcan, Oguz Aydin; Arda Guler, Kenan Yildiz, Baris Yilmaz.
Jogadór EUA
Matt Turner; Joe Scally, Mark Mckenzie, Miles Robinson, Auston Trusty; Weston McKennie, Sebastian Berhalter, Giovanni Reyna; Timothy Weah, Ricardo Pepi, Brenden Aaronson.
Jornalista : Hortêncio Sanchez
Editór : Cancio Ximenes
