DILI, 27 Juñu 2026 (TATOLI) – Selesaun nasionál Senegal konsege mantein sira-nia esperansa hodi kualifika ba ronde 32 Kopa Mundiál FIFA 2026, hafoin rekolla vitória kapás ho skor boot 5-0 hasoru Irake. Jogu ikus ba Grupu I ne’e dezenvolve ho manas tebes iha Estádiu Toronto, Kanadá, iha loron-Sábadu madrugada, oras Timor-Leste nian.
Rezultadu brillante ne’e lori ekipa ho koñesidu Lions of Teranga (Liaun Teranga nian) remata iha terseiru lugar iha klasifikasaun Grupu I. Maske nune’e, sira-nia destinu atu kontinua ba oin depende nafatin ba rezultadu kontajen pontu hosi grupu sira seluk.
Bazeia ba kálkulu faza grupu nian, vitória ne’e tula provizoriamente Senegal ba kintu lugar iha tabela klasifikasaun hosi ekipa terseiru lugar ne’ebé di’ak liu (best third-placed teams). Maibé, pozisaun atu kualifika ba ronde 32 seidauk hetan serteza 100%, tanba grupu lima seluk seidauk kompleta hotu sira-nia faze jogu.
Iha parte seluk, Irake hakotu sira-nia perkursu iha Kopa Mundiál 2026 ho nota ne’ebé dezanima tebes. Ekipa ne’ebé treina hosi Graham Arnold sofre derrota tolu tutuir iha faze grupu, hodi aumenta sira-nia rekorde ladi’ak ba derrota neen (6) hosi jogu neen iha istória partisipasaun Kopa Mundiál nian, no la konsege lori pontu ida mai uma.
Aleinde loke odamatan ba faza eliminatória, vitória ho golu lima ne’e mós kria istória foun nu’udar vitória ho skor boot liu ne’ebé nasaun afrikanu ida konsege marka iha istória Kopa Mundiál FIFA nian.
Domíniu totál Senegal nian ho vantajen numérika
Hosi apitu inisiál árbitru nian, Senegal hatudu kedas ambisaun boot no ritmu atake. Sira hatene katak manán de’it ho skor ki’ik la to’o; sira presiza duni diferensa golu (goal difference) ne’ebé konvense hodi foti sa’e sira-nia kalsifikasaun.
Iha minutu haat (4′) de’it ba jogu, Senegal lidera kedas. Hosi suta kantu ne’ebé lansa hosi Lamine Camara, defeza Abdoulaye Seck foti bola ho kabesa hodi fó asisténsia ba Habib Diarra, ne’ebé dulas de’it bola tama ba baliza Irake nian. Rezultadu dudu ba 1-0.
Dezastre boot akontese ba Irake lakle’ur depoizde golu ne’e. Kapitaun lenda-moris Senegal nian, Sadio Mané, halai sees hosi markadór Rebin Sulaka, molok nia monu besik área penalidade nian tanba hetan tula hosi kotuk. Árbitru koñesidu Anthony Taylor la tasi-kleur hodi fó kedas kartaun mean diretu ba jogadór irakianu ne’e.
Maske joga ho vantajen numérika (jogadór 11 hasoru 10), Senegal la konseke duplika kedas sira-nia golu iha primeira parte. Suta livre hosi Sadio Mané hetan salvamentu di’ak hosi guarda-rede Ahmed Basil, mentres suta forsa hosi Ismail Jakobs hosi liur área penalidade nian semo kleuk ba liur. Irake defende ho disiplina metin to’o primeira parte remata ho skor 1-0.
Tama ba segunda parte, dominasaun Lions of Teranga nian sai imparavel liután iha gramadu Toronto nian. Hafoin oportunidade oioin ne’ebé lakon, Lamine Camara kria fali jogu kail iha lina karuk, antes fó pasajen naruk ne’ebé perfeitu ba Ismaïla Sarr. Avansadu ne’e baku bola ho fasil ba rede ne’ebé mamuk hodi muda skor ba 2-0 iha minutu 50′.
Liutiha de’it minutu balun, Senegal aumenta fali sira-nia kbiit. Pape Gueye lansa suta uniku no maka’as tebes ho ain-karuk hosi liur área penalidade nian, hodi dudu bola sa’e loos ba kantu leten baliza nian, do’ok hosi alkanse guarda-rede Irake. Golu espetakulár ne’e hanesan loos ho golu ne’ebé nia marka iha finál Kopa Áfrika (AFCON). Rezultadu sa’e ba 3-0.
Dezempeñu kail hosi Pape Gueye sai perfeitu liután bainhira nia tula tan nia naran iha tabela markadór minutu 10 liutiha. Aproveita pasajen rona hosi Iliman Ndiaye iha ninin área penalidade nian, médiu senegalés ne’e lansa suta ne’ebé presiza hodi halakon guarda-rede suplente Jalal Hassan ne’ebé foin tama. Skor subitamente sa’e ba 4-0.
Senegal kuaze aumenta tan golu ida liuhosi Sadio Mané, maibé nia esforsu maka’as soke de’it iha trave baliza nian. Festivál golu nian ikusmai taka hosi avansadu Iliman Ndiaye, ne’ebé tama hosi lina kotuk hodi lansa suta maka’as ba kantu leten baliza nian, hodi asegura vitória finál 5-0 ba reprezenta Áfrika nian.
Aliñamentu Jogadór (Line-up)
Senegal (Treinadór: Aliou Cissé): Mory Diaw (GR); Krépin Diatta, Abdoulaye Seck, Moussa Niakhaté, Ismail Jakobs; Idrissa Gueye, Habib Diarra; Ibrahim Mbaye, Lamine Camara, Sadio Mané, Ismaïla Sarr.
Irake (Treinadór: Graham Arnold): Ahmed Basil (GR) [Jalal Hassan 60′]; Frans Putros, Akam Hashim, Rebin Sulaka, Merchas Doski; Amir Al-Ammari; Ali Jasim, Ibrahim Bayesh, Zidane Iqbal, Ahmed Qasem, Ali Al-Hamadi.
Jornalista: Hortêncio Sanchez
Editór: Rafael Ximenes de A. Belo
