DILI, 29 Juñu 2026 (TATOLI)—Governu liuhusi Primeiru-Ministru Interinu, Mariano Assanami Sabino, agradese ba povu tomak ne’ebé hatudu ona respeitu, unidade no responsabilidade iha Lutu Nasionál ba Saudozu Eis Prezidente Repúblika, Francisco Guterres “Lú Olo” nia falesimentu.
“Ba sidadaun hotu-hotu ne’ebé presta sira-nia omenajen, respeita períodu Lutu Nasionál no hamutuk iha tempu susar ida-ne’e, reprezenta IX Governu konstitusionál no Primeiru Ministru, Kay Rala Xanana Gusmão, hato’o ha’u-nia rekoñesimentu no respeitu tomak. Hanesan nasaun ida, ita hatudu katak ita hatene oinsá atu fó onra no respeitu ba saudozu no ba ita-nia lutadór sira-ne’ebé fó sira-nia vida tomak ba liberdade no ba ita-nia nasaun. Tanba ne’e, dala ida tan apresia no agradese barak ba joven sira no ba povu Timor-Leste no ba institusaun oin-oin,” Assanami dehan iha konferénsia imprensa, iha Palásiu Governu, Segunda ne’e.
Nia hatutan partisipasaun boot husi povu iha serimónia fúnebre no omenajen oioin iha rai-laran no mós iha rai li’ur, hatudu dala ida tan katak povu Timor fó rekoñesimentu kle’an ba legadu husi Prezidente Asembleia Konstituinte, Antigu Prezidente Parlamentu Nasionál no Eis Prezidente Repúblika, Francisco Guterres “Lú Olo”.
Nune’e mós hakarak agradese ho maneira espesiál ba Forsa Defeza Timor-Leste (F-FDTL) no Polísia Nasionál Timor Lorosa’e (PNTL), autoridade relijioza sira, profisionál saúde síra, funsionáriu públiku sira, órgaun komunikasaun sosiál sira, organizasaun sosiedade sivíl sira no instituisaun privada inklui manorin no estudante sira-ne’ebé ho dedikasaun, profisionalizmu no espíritu misaun kontribui ba serimónia hotu-hotu la’o ho dignidade, orden no respeitu.
“Ita-nia Saudozu Francisco Guterres “Lu Olo” fizikamente ita haloot ona, maibé nia ideia, hanoin,vizaun sei nafatin inspira ita no jerasaun sira-ne’ebé tuirmai, para servisu ba dame, unidade nasionál no dezenvolvimentu Timor-Leste nian. Lori Governu nia naran, dala ida tan ha’u renova ha’u-nia kondolénsia kle’an liu ba família enlutada, ba partidu FRETILIN no agradese ba povu timoroan hotu-hotu tanba solidariedade no ezemplu sivizmu ne’ebé fó ba ita-nia rain, apresia no obrigadu,” nia agradese.
Jornalista: Osória Marques
Editór: Xisto Freitas da Piedade
