DILI, 29 Juñu 2026 (TATOLI) – Ministériu Saúde no Ospitál Nasionál Guido Valadares (HNGV, sigla portugés) lansa, iha ámbitu aniversáriu HNGV ba da-23, sistema dijitál ba kartaun saúde, hodi substitui sistema manuál ne’ebé uza durante ne’e, atu aselera rejistu pasiente no hasa’e efisiénsia no kualidade atendimentu saúde.
Diretór-Ezekutivu HNGV, Nuno Vital Soares, hateten katak sistema foun ne’e hahú ona implementa no pasiente sira ne’ebé halo rejistu sei simu kartaun dijitál, la’ós tan karatun manuál hanesan uluk.
“Ha’u sei la haree ita-boot nia dadus iha arkivu. Bainhira pasiente ida mai ha’u sei la haree nia moras saida, pasiente no médiku ne’ebé atende de’it mak bele hatene nia moras”, nia dehan iha HNVG, ohin.
Nuno Vital esplika katak implementasaun sistema dijitál ne’e sei hala’o tuir faze. Iha etapa dahuluk, programa pilotu sei implementa iha HNGV, no depois mak sei estende bá ospitál no sentru saúde iha munisípiu hotu.
Nia akrexenta katak HNGV kontinua dezenvolve kapasidade rekursu umanu, liuhusi formasaun ba médiku no profisionál saúde sira atu uza teknolojia dijitál no telemedisina, ho apoiu husi Organizasaun Mudiál Saúde.
“Nune’e bele liga mai bainhira atu halo transferénsia pasiente ruma, médiku sira bele komunika ba malu husi munisípiu mai iha HNGV”, dehan.
Notísia relevante: HNGV selebra aniversáriu ba da-23, pasiente sira kontinua lamenta falta ai-moruk
Jornalista: Felicidade Ximenes
Editora: Maria Auxiliadora
