BAUKAU, 29 Juñu 2026 (TATOLI)—Responsavel hamutuk ho operadór tratór husi Serbisu Munisipál Agrikultura Baukau (SMAB) lamenta ho desizaun Ministériu Agrikultura, Pekuária, Peká no Floresta (MAPPF) relasiona ho redusaun osan subsídiu iha kada fulan.
Xefe Mekanizasaun SMAB, Manuel da Costa Gusmão, esplika desizaun referida afeta funsionáriu sira tanba kauze operadór ka tratorista sira hela distánsia dook bainhira hala’o serbisu iha baze no desizaun ne’ebé iha laiha konsultasaun direta ho tratorista sira.
“Osan iha 2026 ne’e derepente tun, ne’ebé ami seidauk hatene nia razaun. Ami-nia operadór sira-ne’e kada trimestrál hetan $ 60, responsavel hetan $75,” Manuel hateten iha Vila Antiga, Baukau, Segunda ne’e.
Nia relata redusaun referida kategoriza osan insentivu nian, iha-ne’ebé diferente ho tinan 2025 tanba kada trimestrál pesoál responsavel simu $ 150 no operadór $110, enkuantu inísiu tinan-ne’e insentivu ba responsavel redús ba $75 no operadór $60.
Nune’e, Manuel Gusmão preokupa desizaun referida tanba tratorista balun hela iha postu administrativu ida bá hala’o servisu fila-rai iha postu administrativu seluk, tan ne’e orsamentu insentivu la sufisiente ona ba sira hodi hala’o servisu ha terrenu.
“Ami husu Governu atu haree didi’ak, tanba ami-nia kolega husi munisipiu seluk nia osan simu kompletu, maibé ami-nia iha Baucau ne’e mak derepende tun tiha deit,” Manuel Gusmão informa.
Iha fatin seluk, Diretór Serbisu Munisipál Agrikultura Baukau, Agostinho Ximenes, hateten Governu liuhusi MAPPF deside redús osan insentivu tinan-ne’e maibé haree ba saláriu la responde nesesidade hotu, nune’e Governu kontinua mantein subsídiu maibé halo redasaun tanba bazeia ba orsamentu jerál Estadu (OJE) ne’ebé aloka ba ministériu.
“Loos duni, tinan-ne’e pesoál responsabilidade kada fulan simu $25, kada trimestrál hetan $75, enkuantu tratorista sira kada fulan simu $20 no kada trimestrál $ 60,” Agostinho hateten.
Entretantu, Serbisu Munisipál Agrikultura Baukau rejista operadór ka tratorista ne’ebé fila-rai ba agrikultór sira iha Munisípiu Baukau hamutuk na’in-25.
Jornalista: Natalino Belo
Editór: Xisto Freitas da Piedade
