ABCID fasilita formasaun tékniku programasaun ba produtór RTTL, E.P
DILI, 30 Juñu 2026 (TATOLI)–Australian Broadcasting Corporation International Development (ABCID), Tersa ne’e, fasilita formasaun ba produtór na’in-20 programasaun iha Rádiu Televizaun Timor-Leste, Empreza Públika (RTTL, E.P) hodi eleva kapasidade no koñesimentu nune’e iha futuru bele hadi’a liután kualidade programa sira.
Formasaun sei foka liu ba tékniku produsaun ba programa sira iha televizaun nune’e bele atrai liu atensaun públiku. Formasaun ne’e sei la’o durante loron-rua nia laran, hahú 30 Juñu to’o 01 Jullu.
Sekretáriu Estadu Komunikasaun Sosiál, Expedito Dias Ximenes, hateten, durante ne’e produtór sira iha RTTL halo produsaun ba programa oioin, nune’e ho formasaun ne’e bele atualiza no dezenvolve liu teknolojia dijitál. Aleinde ne’e, presiza hasa’e koñesimentu.
“Ho dezenvolvimentu oras ne’e daudaun iha kompetitór, ita hotu hatene iha mídia konvensionál plataforma dijitál oioin, ne’ebé RTTL mós hakarak hasa’e, hato’o saida mak sira presiza halo hanesan kanál ofisiál Estadu,” Sekretáriu Estadu hato’o ba Jornalista hafoin halo abertura ba formasaun iha Hotel Timor.
Notísia relevante : Jornalista 24 tuir formasaun loron tolu hosi CITL-ABCID iha Oé-Cusse
Governante ne’e konsidera, formasaun hanesan ne’e importante tebes tanba mídia estatál ne’e nia kobertura to’o ona iha munisípiu hotu no nia produsaun presiza aumenta no hadi’a.
“Ohin ha’u fó hanoin sira, katak RTTL la’ós de’it ita atu iha ambisiozu ka atu ba de’it kuantidade produsaun, maibé haree liu ba kualidade produsaun,” nia afirma.
Biban ne’e, Sekretáriu Estadu husu ba ABCID atu kontinua formasaun sira ne’e tanba daudaun mídia estatál hanesan RTTL, E.P no Ajénsia Notisioza Timor-Leste – TATOLI, I.P sai parseiru ona hodi fó formasaun ba jornalista sira.
Iha fatin hanesan, Formadora ABCID Lauren Hillman, hateten, formasaun ne’e sei fó foku ba tékniku produsaun programa televizaun, haree hamutuk programa sira ne’ebé agora la’o hela no oinsá atu haree programa foun sira ne’ebé atu mai inklui oinsá atu halo programa ne’e barak liután hodi hetan patrosinadór husi programa sira ne’e.
Jornalista : Natalino Costa
Editora : Julia Chatarina
