VIKEKE, 30 Juñu 2026 (TATOLI)—Xefe Suku Bibileo, Postu Administrativu Vikeke Vila, Munisípiu Vikeke, Moises A. D. C. Pinto hateten, daudaun ne’e, Suku Bibileo hahú implementa obra konstrusaun sirtu estrada betaun liga suku laran hodi fasilita movimentu komunidade.
“Tinan ida-ne’e ami fó prioridade ba estrada liga suku laran, tanba iha suku laran kondisaun aat. Kuandu iha tempu udan difikulta tebes komunidade, karreta ne’ebé halo movimentasaun iha-ne’ebá sempre mout,” Moises TATOLI iha Postu Vikeke Vila, Tersa ne’e.
Autoridade Suku Bibileo ne’e hatutan daudaun ne’e badaen lokál sira konstrui ona valeta, hafoin hotu komesa ateru hotu foin cor simentu ho fatuk-britas (kerikil).
“Ita-nia joven sira iha Bibileo mak sai badaen rasik halo servisu ne’e. Implementasaun ne’e ita foin hahú, ne’ebé obra ninia progresu fíziku atinje 15%,” Moises informa.
Tuir nia katak durasaun konstrusaun estrada sirtu betaun ne’e fulan-Dezembru tinan ne’e tenke konkluidu.
“Ita hakarak estrada kualidade di’ak, entaun ami tenke tau-matan beibeik, tanba ita mak uza no komunidade. Estrada referida ho distánsia metru 400, estrada nian luan metru haat (4), sei gasta orsamentu rihun $2 husi Programa Nasionál Deszenvolvimentu Suku (PNDS) tinan 2026 nian,” nia hato’o.
Obra referida sei benefísia populasaun husi Suku Bibileo hamutuk aldeia ualu (8), ho totál populasaun hamutuk 3.156.
Jornalista: Vitorino Lopes da Costa
Editór: Xisto Freitas da Piedade
