KOVALIMA, 30 Juñu 2026(TATOLI) – Prezidente Konsellu Konsultivu Munisipál, Miguel Armada Cardoso ,Tersa-ne’e, fó posse ba membru konsellu konsultivu foun atuál xefe Suku Tashilin, Afonso Sarmento Martins, hodi troka Xefe Suku Tashilin sesante ,Jaco Alves “Taroman” husi postu administrativu Zumalai, Munisípiu Kovalima.
“Ita fó posse ba pesoál sai membru foun tanba foin lalais ne’e ita iha mudansa ba kargu xefe Suku Tashilin sesante husi postu administrativu Zumalai sai ona menbru konsellu vetaranu Kovalima entaun nomea fali xefe suku foun, nune’e nia sai fali ba membru Konsellu Konsultivu”, dehan Prezidente Autoridade Kovalima ne’e ba jornalista-sira iha salaun AMC.
Prosesu troka xefe Suku foun deside liuhusi reuniaun Konsellu Suku hodi eskolla xefe aldeia ne’ebé mak ho idade boot liu hodi sai xefe suku. Autoridade Kovalima fó ba pesoál membru \KKM liuhusi reuniaun konsellu koordenasaun Munisipál tanba durante ne’e la la’o no membru ida ne’e aujente entaun presiza iha subtituisaun.
Iha sorin seluk, Membru konsellu konsultivu Munisipál foun atuál xefe Suku Tashilin, Afonso Sarmento Martins dehan nia parte prontu atu simu responsabilidade knaar ne’ebé mak nia parte simu ona hodi obedese ba programa sira.
“Ha’u durante ne’e asume kargu hanesan xefe aldeia iha tashilin periodu haat hahú 2005 mai to’o ohin loron no prontu asume kargu sai xefe Suku iha suku Tashilin hodi obedese ba desizaun autoridade Kovalima”, nia afirma.
Xamada ba membru ne’ebé aujente
Membru KKM atuál xefe Suku Belekasak, Leonito Gusmão, husu ba Prezidente KKM atu fó karta xamada atensaun ba membru sira ne’ebé la tuir ajenda reuniaun.
“Ita hala’o reuniaun konsellu koordenasaun Munisipál tarde tanba la prense korum nune’e presiza hein membru sira bainhira atu hala’o reuniaun KKM presiza hein membru, nune’e ba oin hato’o karta xamada kedan,” dehan nia.
Bazeia ba ajenda reuniaun KKM hala’o iha tuku 8:30 maibé hala’o fali iha tuku 10:30 entaun presiza atu haree asuntu hirak ne’e.
Iha sorin seluk, membru KKM, Damião Amaral reforsa presiza atu haree duni kestaun hala’o reuniaun KKM ho tarde,tanba reuniaun KKM ne’e importante atu diskute no aprova asuntu ne’ebé relasaun ho povu Kovalima nia moris.
“Ita presiza atu haree asuntu sira hanesan ne’e nune’e hodi kumpre regra reuniaun KKM ne’ebé mak deside ona, se la kumpre presiza atu haree asuntu referidu”, nia reforsa.
Hatan ba kestaun ne’e, Prezidente KKM Miguel Armada Cardoso, dehan Membru KKM aujente iha reuniaun KKM dala tolu prezidente KKM iha kompeténsia tomak atu foti desizaun liuliu fó karta notifikasaun bele hasai husi membru KKM.0
“ Iha akta reuniaun ita sempre haree ba membru sira la partisipa reuniaun KKM ba datoluk automatikamente ita aplika sansaun, durante ne’e ita haree membru nain-ida mak la ativa, ita aplika ona sasaun hodi fó notifikasaun”, nia esplika
Tuir dadus membru KKM atu partisipa iha reunian ne’e hamutuk 51 husi númeru ne’e na’in-32 mak partisipa, na’in-19 aujente iha reuniaun KKM.
Bazeia ba ajenda reuniaun KKM ne’e autoridade Kovalima deskuti ajenda sira hanesan,halo aprezentasaun no votasaun ba proposta no rekomendasaun sira kona-bá asuntu intrese lokál ne’ebé propoin husi membru KKM
Votasaun ba proposta alterasaun orden traballu bainhira prezidente KKM propoin,aprezenta esbosu lei tara bandu,Membru Kosellu Konsultivu Munisipál halo intervensaun durante periodu partisipasaun popular atu responde de’it ba kestaun husi sidadaun-sira, Votasaun ba proposta Partisipasaun Popular 15 Sidadaun rejistadu 24 horas antes sorumutu hahú halo intervensaun hodi Trata asuntu ba interese lokál, aprezenta reklamasaun, protestu no rekursu, husu esplikasaun ka esklaresimentu ho diskute no fó parser ba materia ne’ebé hatúr iha konvokatóriu.
Jornalista:Celestina Teles
Editór:Florencio Miranda Ximenes
