DÍLI, 30 Juñu 2026 (TATOLI) – Klinika Bairru Pité rejista kazu tuberkuloze (TB) hamutuk 247 husi fulan Janeiru to’o Juñu, no ema nain lima lakon vida tanba moras ne’e.
Jestór Programa Tuberkuloze (TB) Klinika Bairru Pité, José Maia Soares, hateten kazu 247 ne’e kompostu husi mane 149 no feto 98, inklui labarik 19.
“Pasiente sira-ne’e halo ona teste kaben-tasak no rezultadu konfirmadu pozitivu. Dadaun ne’e sira simu hela tratamentu ho hemu ai-moruk regularmente durante fulan neen to’o fulan sia. Maski nune’e, ema nain lima la konsege salva sira-nia moris,” José informa ba TATOLI iha Klinika Bairru Pité, ohin.
Jestór ne’e husu ba pasiente sira atu hemu ai-moruk ho loloos hodi hetan rekoperasaun kompleta.
Nia hateten Klinika Bairru Pité serbisu hamutuk ho organizasaun Secular Institute Maun Alin iha Kristu (ISMAIC), ne’ebé oferese fatin iha Tibar hodi akumula pasiente TB sira ba tratamentu intensive atu hamenus risku transmisaun moras ne’e ba ema seluk.
“Pasiente sira-ne’ebé rezultadu teste kaben-tasak pozitivu, ami haruka ba ISMAIC hodi halo izolamentu no deskansa, atu hamenus transmisaun moras ne’e ba komunidade,” nia dehan. “Hafoin pasiente sira hemu ai-moruk durante fulan neen to’o fulan sia, profisionál saúde sira sei halo fali ezame. Karik rezultadu negatívu, pasiente sira bele fila ba sira-nia uma.”
José esplika katak tuberkuloze hanesan moras infeksaun bakteriál ne’ebé afeta liu-liu pulmaun, maibe moras ne’e mos bele afeta ba parte seluk iha isin. Moras ne’e da’et husi ema ida ba ema seluk liuhosi mear no fani. Risku transmisáun aas liu iha ambiente ne’ebé la iha ventilasaun di’ak.
Tanba ne’e, José husu ba komunidade, liuliu ba pasiente TB sira, atu halo distánsia ho ema seluk, taka ibun no inus bainhira mear ka tafui kabén, no hemu ai-moruk tuir orientasaun profisionál saúde.
Tuberkuloze mak moras ne’ebé bele da’et lalais, maibé bele kura kompletamente karik hemi ai-moruk ho loloos no kompleta tratamentu tuir orientasaun médiku.
Jornalista: Camílio de Sousa
Editór: Filomeno Martins
