VIKEKE, 01 Jullu 2026 (TATOLI)–Ekipa Ministériu Administrasaun Estatál (MAE) hamutuk ho Autoridade Munisípiu Vikeke liuhusi Diresaun Asuntu Apoiu naun Govermentál Komunitáriu formaliza ona António de Almeida hodi substitui Xefe Suku Vessoru, Paulo Fernandes ne’ebé fila ona ba Aman Maromak nia kandunan santu.
Diretór Servisu Asuntu Organizasaun naun Govermentál komunitáriu, Cosme Sarmento, haktuir kona-ba substituisaun matebian Paulo Fernandes la liuhusi prosesu eleisaun, halo de’it substituisaun, maibé haree konsellu suku sira-ne’ebé idade boot mak bele subtitui hodi troka xefe suku nian fatin.
Notísia relevante: Xefe Suku Vessoru lakon vida
“Substituisaun ne’e la liuhusi prosesu eleisaun tanba eleisaun ne’e tinan hitu dala ida. Tan ne’e mak ita la realiza eleisaun iha períodu klaran,” Cosme Sarmento ba TATOLI iha Postu Vikeke Vila, Kuarta ne’e.
Nia dehan substituisaun ne’e laiha serimónia pose ba xefe suku agora, halo de’it formalizasaun husi munisípiu no MAE hodi fó-sai ofisial ba populasaun sira katak Xefe Suku Vessoru atuál mak António Almeida.
Iha Munisípiu Vikeke akontese substituisaun ba konsellu suku iha Postu Vikeke mak hanesan Suku Uma-Ua’in Leten iha xefe aldeia na’in-ida (1) no delegadu na’in-ida (1), Suku Uma-Ua’in Kraik iha xefe aldeia na’in-ida (1), Suku Uaimori halo substituisaun ba xefe aldeia ida mate, Postu Uatulari iha Suku Makdike de Baixo halo substituisaun ba xefe aldeia na’in-ida (1) no Suku Vessoru mak halo substituisaun ba xefe suku no momea xefe aldeia na’in-ida (1) husi Suku Vessoru.
Entretantu, iha Munisípiu Vikeke konklui ona substituisaun ba membru konsellu sira-ne’ebé mate no rezignasaun sira daudaun ne’e, konsellu suku sira iha suku 38 kompleta hotu ona no ativa hikas servisu ba atendimentu populasaun.
Jornalista: Vitorino Lopes da Costa
Editór: Xisto Freitas da Piedade
