DILI, 02 Jullu 2026 (TATOLI) – Governu, liuhosi Autoridade Munisípiu Dili, hamutuk ho ekipa Ministériu Obras Públikas (MOP), konklui ona prosesu despezu administrativu ba uma-kain 98 iha Aldeia 02 Hamahon, Suku Kampung Alor, hafoin komunidade sira asina termu aseitasaun ba pagamentu indemnizasaun. Fatin ne’e sei prepara ba konstrusaun Embaixada nasaun membru ASEAN sira ne’ebé mak seidauk establese iha Timor-Leste.
Prezidente Autoridade Munisípiu Dili (PAM-Dili), Francisco dos Santos, hateten katak rai ne’ebé komunidade okupa ne’e propriedade Estadu nian, no Governu deside utiliza ba projetu estratéjiku mak hanesan konstrusaun Embaixada ba nasaun membru ASEAN sira.
“Tanba ne’e ohin ami mai hamutuk ho ekipa MOP atu ajuda komunidade sira sobu rasik sira-nia uma. Sira kolabora di’ak tanba antes ne’e hotu-hotu ona asina ona termu aseitasaun ba indemnizasaun,” dehan Francisco dos Santos ba TATOLI iha Kampung Alor, Dili.
Nia dehan maioria komunidade sira simu desizaun Governu no prontu muda ba fatin seluk. “Governu prepara kareta atu fasilita transporte ba família sira ne’ebé fila ba sira nia munisípiu hanesan Lautém, Likisá no fatin seluk,” Francisco haktuir.
“Laiha ema ida halo perturbasaun. Hotu-hotu simu no kolabora. Antes ne’e Governu, liuhosi SEATOU no MOP, fó ona prazu loron 90 no aumenta tan loron 10 atu komunidade sobu rasik sira-nia uma. Ohin, Autoridade Munisípiu Dili mai atu fasilita sira nia movimentasaun ho maneira digna no respeitu ba ema hotu,” dehan Francisco.
Komunidade Aldeia 02 Hamahon, Virgílio Marques, hateten katak nia komunidade kolabora ho Governu tanba rai ne’e propriedade Estadu nian.
Marques husu Governu atu aselera pagamentu indemnizasaun atu bele sosa ka buka fatin foun.
“Ami prontu sai husi fatin ne’e tanba ami hotu asina ona termu aseitasaun. Dadaun ne’e ami sobu ona ami nia uma no fatin negósiu. Maibé ami husu Governu atu aselera pagamentu indemnizasaun atu ami bele buka fatin seluk ba hela,” dehan Virgílio.
Elio Gonzalves, nain ba Jenivan Restaurante, afirma katak nia prontu entrega fatin ba Governu tanba hodi aselera dezenvolvimentu nasaun nian.
“Timor-Leste presiza dezenvolvimentu. Nasaun tenke lao ba oin, la’ós fila ba kotuk. Tanba ne’e ami kolabora ho Governu atu hamamuk fatin ida-ne’e hodi fó oportunidade ba Governu halo dezenvolvimentu,” dehan Elio.
Tuir informasaun husi autoridade, área referida iha tempu okupasaun Indonézia uza hanesan Perumahan Perhubungan Laut. Depois tama ba ukun-an, komunidade sira hahú okupa rai ne’e hodi harii uma no loke negósiu hanesan restaurante, ofisina no atividade ekonomia seluk.
Jornalista: Camilio de Sousa
Editór: Filomeno Martins
