DILI, 07 Jullu 2026 (TATOLI)—Béljika asegura sira-nia dalan hakat ba iha kuartu finál hodi hasoru España iha Kopa Mundiál 2026, hafoin halakon Estadu Unidu Amérika (EUA) ho golu 4-1 iha jornada 16 iha Estádiu Seattle, Washington, tersa dadeer oras Timor-Leste nian.
Husi vitoria ne’e, Béljika sei hasoru España iha kuartu finál Kopa Mundiál 2026 hodi hadau malu ba meiu finál.
Golu haat Béljika nian marka husi Charles de Ketelaere (iha minutu neen no 33), Hans Vanaken (iha minutu 57), no Romelu Lukaku (minutu 90+3). Malik Tillman marka golu ba EUA iha minutu 31.
Bainhira jogu la’o, Béljika foti inisiativa husi inísiu, ho objetivu atu hetan golu ida. Béljika hetan oportunidade iha minutu ualu, bainhira suta Youri Tielemans nian la’o dook husi guarda-rede norte-amerikanu ne’ebé guarda husi Matt Freese.
Iha minutu daneen, Béljika halo EUA hakfodak ho golu ida husi Charles de Ketelaere. Golu ne’e mai husi sutu Nicolas Raskin nian, hafoin kruzamentu ne’ebé maka’as.
Hafoin lidera 1-0, Béljika kontinua domina jogu iha minutu 15 dahuluk, enkuantu EUA tenta atu sobu defeza Rudi Garcia nian.
Hafoin pauza tempu hemu bee nian, EUA hahú ataka. Presaun hamosu falta sira husi jogadór belga sira besik sira-nia área penalidade rasik.
Suta livre husi Malik Tillman iha minutu 31 tama liu baliza laran, hodi halo guarda-redes Thibaut Courtois laiha kbiit atu salva bola hodi musa eskore muda ba 1-1.
Liutiha minutu rua, Béljika hetan vantajen 2-1 hasoru Estadu Unidu, ho Charles de Ketelaere iha fali markadór. Ninia golu daruak mai husi kruzamentu Leandro Trossard, ne’ebé Ketelaere kabesa tama ba rede.
Iha minutu 40, guarda rede EUA nian, Matt Freese, trava Nicolas Raskin nia suta kantu baixu husi Béljika.
Béljika kontinua presiona, maibé EUA mós tenta halo empata, inklui iha minutu 45, bainhira suta Folarin Balogun nian husi baliza belga nia oin liu.
EUA koko atu uza kontra-atake lalais ida hodi marka golu, maibé defeza belga nian dixiplinadu. Iha intervalu, Béljika nafatin lidera EUA 2-1.
Inísiu husi segunda parte mak EUA nian, domina pose. Maske nune’e, ekipa Mauricio Pochettino nian luta hodi kria oportunidade maske kontinua harii atake sira.
Iha minutu 57, Béljika aumenta tan sira-nia vantajen hafoin guarda-rede norte-amerikanu halo sala ida iha área penalidade nia li’ur. Bola ne’e hetan de Ketelaere, ne’ebé pasa ba Hans Vanaken, ne’ebé tiru ba kantu karuk rede nian, hodi halo 3-1.
Béljika, maibé, la dezanima ho jogu EUA nian no defende beibeik sira nia área, hodi prevene Christian Pulisic no nia kolega sira atu hakat liu.
Uma-na’in sira kontinua ataka ho agresivu. Iha minutu 83’, Folarin Balogun nia kabesa husi kantu ne’e hetan salvasaun husi guarda rede belga Thibaut Courtois.
Defeza Béljika nian sai kle’an liután, dala barak joga bola iha sira-nia parte rasik bainhira iha pose. EUA nafatin la hetan dalan atu tama iha defeza Béljika.
Envezde, Béljika aumenta sira-nia vantajen ba 4-1 liuhusi suplente Romelu Lukaku iha minutu 90+3. Golu ne’e mosu tanba erru ida husi defeza norte-amerikanu Chris Richards. Lukaku hasai bola no suta baixu ida ba iha kantu karuk husi baliza EUA nian. Eskoru mantein 4-1 afavór Béljika nian to’o jogu remata.
EUA:
Matt Freese; Alex Freeman, Chris Richards, Tim Ream; Sergino Dest, Weston McKennie, Tyler Adams, Malik Tillman, Antonee Robinson; Folarin Balogun; Christian Pulisic.
Béljika:
Thibaut Courtois; Timothy Castagne, Brandon Mechele, Nathan Ngoy, Maxim De Cuyper; Youri Tielemans, Amadou Onana; Nicolas Raskin, Dodi Lukebakio, Leandro Trossard; Charles De Ketelaere.
Jornalista : Hortêncio Sanchez
Editór : Cancio Ximenes
