DILI, 07 Jullu 2026 (TATOLI)-Prokuradór-Jerál Repúblika (PJR), Nelson de Carvalho, rekomenda ba Parlamentu Nasionál atu fó prioridade ba diskusaun Lei Sibernétika hodi hetan aprovasaun.
Nia hato’o sujestaun ne’e iha ámbitu aprezenta relatóriu anuál 2025 Ministériu Públiku (MP) nian iha reuniaun plenária Parlamentu Nasionál, ohin.
Durante aprezentasaun ne’e, nia hato’o sujestaun no perspetiva sira reforma nian ba órgaun lejizlativa atu presta atensaun.
Nia destaka mós nesesidade atu iha lejizlasaun nasionál kona-ba sibernétika no adezaun ba Konvensaun ONU nian.
“Urjente atu aprova lejizlasaun nasionál kona-ba siberkrime, armonizadu ho Konvensaun Nasaun Unida nian kona-ba Siberkrime, ne’ebé Timor-Leste tenke adere ba”, nia hateten.
Hodi salienta katak adezaun ida-ne’e sei permite atu reforsa ordenamentu jurídiku Timór nian iha área ida ne’ebé sei iha lakuna, iha tempu hanesan hodi fortalese kapasidade kooperasaun internasionál.
“Iha mundu ne’ebé teknolojia sira informasaun no komunikasaun nian dezempeña papél krusiál ida iha dezenvolvimentu país sira-nian, Timor-Leste labele hasees an husi realidade ida-ne’e”, nia dehan.
Antes ne’e, Prezidente Komisaun A ne’ebé Trata Asuntu Konstitusionál no Justisa, Natalino dos Santos, dehan Komisaun prepara ona ezbosu Lei Krime Sibernétika, maibé atu avansa lalais presiza trata uluk pakote lei balun uluk. Tanba ne’e, daudaun Komisaun halo uluk alterasaun ba Kódigu Penál hodi mellora, liuliu atu kriminaliza defamasaun no injúria tanba agora laiha rejime kontra ordenasaun. Alterasaun ne’e iha ligasaun ba malu ho lei sira ne’ebé finaliza ona mak prosesu tuirmai haree fali Lei Protesaun Dadus, Lei Siberseguransa no Sibernétika.
Komisaun tau ona prioridade durante iha lejizlatura daneen ne’e no sei finaliza no aprova lei hirak ne’e.
Tuir planu, Komisaun sei halo uluk semináriu internasionál hodi rona perítu sira kona-ba Lei Sibernétika.
Notísia relevante: MJ submete ona ezbosu Lei Sibernétika ba MPCM
Jornalista: Nelson de Sousa
Editora: Maria Auxiliadora
