DILI, 09 Abríl 2026 (TATOLI)-Ministériu Justisa (MJ) submete ona ezbosu Lei Sibernétika ba Ministériu Prezidénsia Konsellu Ministru (MPCM, sigla portugés).
Objetivu husi lei atu regula kestaun legál sira ne’ebé relasiona ho uzu internet no teknolojia dijitál, hahú husi krime sibernétiku too protesaun dadus pessoal.
“[Relasiona ho] Lei Sibernétika, ezbosu ita hatama ona. Hetan ona apresiasaun iha Konsellu Ministru. Halo [ona] submisaun ba Ministru Prezidénsia Konsellu Ministru bele halo revizaun balun [antes] haruka ba Parlamentu Nasionál,” Ministru Justisa, Sérgio Hornai, hateten ba jornalista sira iha resintu Parlamentu Nasionál, ohin.
Governante ne’e dehan lejizlasaun ne’e sai prioridade ba ministériu, tanba ezijénsia públiku nian, tanba ne’e nesesita duni hodi regulariza utilizadór mídia sosiál ne’ebé ho identidade falsa hodi ataka ema seluk.
Iha fatin hanesan, Prezidente Komisaun A iha Parlamentu Nasionál ne’ebé Trata Asuntu Konstituisionál no Justisa, Natalino dos Santos, konsidera lejizlasaun ne’e importante no ida ne’e sai prioridade ba komisaun nian iha tinan ne’e atu bele halo diskusaun.
Notísiarelevante https://tatoli.tl/2026/01/19/bankada-cnrt-ezije-aprezentasaun-urjensia-lei-sibernetika-hodi-kontrola-id-falsa/
Jornalista: Nelson de Sousa
Editora: Isaura Lemos de Deus
