DILI, 19 Janeiru 2026 (TATOLI)-Xefe Bankada Partidu Kongresu Nasionál Rekonstrusaun Timorense (CNRT, sigla portugés), Patrocínio dos Reis Fernandes, husu ba Ministériu Justisa (MJ) atu aprezenta lalais proposta Lei Sibernétika ba órgaun lejislativa hodi bele halo diskusaun no aprovasaun.
Deputadu ne’e lamenta ho utilizadór mídia sosiál balun, ne’ebé uza identidade falsa hodi ataka ema seluk ho linguajen la edukativu, ne’ebé sai preokupasaun boot no hatudu lakon morál iha sosiedade ne’ebé nakonu iha valór kulturál no relijiaun oioin.
Maski Governu halo ona elaborasaun ba ezbosu lei ne’e no organiza semináriu no halo konsulta ho sosiedade sívil, maibé prosesu ne’e la’o kle’ur.
“Ami ezije beibeik Governu atu lori ona lei ne’e mai, hodi ita bele tau regra atu orienta sai sosiedade ne’ebe degradadu husi valór kultrál, sosiál”, nia hato’o iha intervensaun iha reuniaun plenária Parlamentu Nasionál, ohin.
Iha fatin hanesan, deputada CNRT, Cedelízia Faria dos Santos, dehan presiza halo diskusaun urjente ba lejislasaun ne’e, tanba ema irresponsavel uza sala Intelijénsia Artifisiál (IA) no mídia sosiál. Nia apela ba timoroan hothotu atu ka’er metin ninia valór kulturál no respeita malu.
Deputada ne’e solista ba Sekretaria Estadu Komunikasaun Sosiál (SEKOMS) atu halo kooperasaun ho provider sira, ho Youtube, Facebook no seluk tan atu ba oin blokeia tiha identidade falsa no ho parte Polísia Sientífika Investigasaun riminál (PCIC, sigla portugés) atu bele deteta hodi investiga aktu referidu.
Deputadu CNRT, Natalino dos Santos, mós dehan presiza lejislasaun ne’e, tanba haree nasaun ne’e nia sidadaun balun laiha ona étika no kultura.
Nia husu ba Ministériu Transporte no Komunikasaun (MTK) atu orienta Autoridade Nasionál Komunikasaun (ANC, sigla portugés) hodi haree ba ema irresponsavel ne’ebé foti ema seluk nia fotográfia halo edisaun utiliza lianguajen la edukativa.
Antes ne’e, Ministru Justisa, Sergio Hornai, hateten prepara ona ezbosu Lei Sibernétika ne’ebé iha hela faze revizaun.
Notísia relevante: Komisaun A prioriza dikusaun Lei Sibernétika iha tinan oin
Jornalista: Nelson de Sousa
Editora: Maria Auxiliadora
