DILI, 19 Dezembru 2025 (TATOLI) – Komisaun A ne’ebé trata Asuntu Konstitusionál no Justisa iha Parlamentu Nasionál priotiza, iha 2026, diskusaun ba Lei Sibernétika.
Vise-Prezidente Komisaun A, António Verdial de Sousa, hateten lejizlasaun ne’e importante atu kontrola utilizadór mídia sosiál balun ho identidade falsa hodi ataka ema seluk ho uza linguajen la edukativa.
Nune’e, presiza baze legál hodi halo reformasaun mentál ba sidadaun sira hodi eduka, tanba país ne’e moris iha kultura ida metin tebes. “Ami hanoin ba tinan oin, lei ida-ne’e tenke lalais ho urjente”, nia hateten.
Prezidente Komisaun A, Patrocínio dos Reis Fernandes, dehan durante tinan ne’e, Ministériu Justisa no Ministériu Transporte Komunikasaun iha faze elaborasaun ba lejizlasaun ne’e no halo konsulta bainhira finaliza sei submete ba Parlamentu hodi halo diskusaun no aprovasaun.
Notísia relevante: https://tatoli.tl/2025/04/03/komisaun-a-no-governu-diskute-posibilidade-introdus-elementu-kriminal-iha-ezbosu-lei-sibernetika/
Jornalista: Nelson de Sousa
Editora: Maria Auxiliadora
