DILI, 03 Abríl 2025 (TATOLI)—Komisaun A iha Parlamentu Nasionál (PN) ne’ebé trata asuntu Justisa no Konstituisionál, kinta ne’e, hala’o audiénsia ho entidade relevante hodi posibilidade introdús elementu kriminál iha lejizlasaun sibernétika ne’ebé elabora hela.
Entidade ne’ebé hola parte iha audiénsia ne’e maka Ministériu Justisa, Ministériu Interiór, Prokuradória Jerál Repúblika no Polísia Sientífika Investigasaun Kriminál.
“Troka hanoin ba malu hanesan ezekutivu ho Parlamentu, atu haree projesaun polítika lejizlasaun ba iha oin, serake ita bele introdús lalais hanesan lei kriminál ba sibernétika,” Ministru Justisa, Sergio Hornai, hato’o ba jornalista sira, hafoin ramata audiénsia iha resintu PN.
Notísia relevante : MJ prepara ona ezbosu lei sibernétika kontrola ID falsa
Audiénsia ne’e hala’o tanba PN simu karta husi Prezidénsia Konferénsia Episkopal Timor-Leste, relasiona ho uzu deskontroladu konta rede sosiál.
Nia dehan, kestaun ne’e mós atu haree bainhira sidadaun sira uza internet, konteúdu ne’ebé la importante no fó efeitu negativu, presiza iha responsabilidade.
“Ohin loron laiha barreira halo impedimentu ho evolusaun dinámika mundu teknolojia uza internet,” nia akresenta.
Governante ne’e katak, Timor-Leste hanesan Estadu soberanu presiza re-define polítika liberdade ida ho finalidade hatuur ho hanoin, teknolojia ho internet ne’ebé avansadu tebes tenke iha ninia benefísiu ba interrese bem estar públiku, la’ós atu mai destroi ka perturba filafali orden públiku Estadu.
Iha sorin seluk, Prezidente Komisaun A ne’ebé trata asuntu Justisa no Konstituisionál iha PN, Patrocínio Fernandes, hateten, Parlamentu nia kompeténsia ida mak atu haree kona-ba lei.
“Mai atu ajusta ho Governu atu haree katak ita presiza tau prioridade iha lejizlasaun sira, ita identifika, halo diagnóstiku ruma para haree ita-nia nasaun presiza saida tan para reforsa autór judisiáriu sira-nia serbisu,” nia hato’o.
Antes ne’e, Sergio Hornai, hateten Ministériu Justisa hamutuk ho entidade relevante sira prepara ona esbozu lei sibernétika hodi haree no aprezenta ba órgaun lejizlativu hodi halo diskusaun no aprovasaun.
Jornalista : Nelson de Sousa
Editora : Julia Chatarina
