MJ prepara ona ezbosu lei sibernétika kontrola ID falsa
DILI, 05 Marsu 2025 (TATOLI)-Ministériu Justisa (MJ) prepara ona ezbosu lei sibernétika, no sei haruka ba órgaun lejisladór Parlamentu Nasionál (PN) hodi halo diskusaun no aprovasaun.
“Ministériu Justisa iha ona ezbosu lei sibernétika, ita hamutuk ho prokuradória ho instituisaun relevante sira, haree hela” Ministru Justisa (MJ), Sergio Hornai, hateten hodi responde TATOLI iha prizasaun Bekora, kuarta ne’e.
Nia konsidera utilizadór mídia sosiál balun utiliza sala ho identidade falsa hodi ataka líder nasionál, uza linguajen la edukativa. “Utilizasaun internet hanesan mídia komunikasaun ida ne’e demaziadu uituan, ita hakarak regularize, ita hotu-hotu iha responsabilidade dignifika ita-nia ema sira tantu feto ka mane ho ema ne’ebé senioridade”, akresenta.
Nia hateten, lei seluk ne’ebé sei submete hamutuk husi parte Governu mak siber-seguransa husi Ministériu Transporte Komunikasaun (MTK) no Ministériu Interior (MI).
Antes ne’e iha reuniaun plenária Parlamentu Nasionál, Deputadu sira preokupa ho ema irresponsável ne’ebé uza identidade falsa iha mídia sosiál hodi ataka líder nasionál sira, nune’e husu parte kompetente atu kontrola no husu Ministériu Justisa atu aprezenta lei sibernétika hodi bele kontrola.
Notísia relevante: Deputadu bankada CNRT husu entidade kompetente kontrola ID falsa
Jornalista : Nelson de Sousa
Editora : Rita Almeida
