DÍLI, 08 Jullu 2026 (TATOLI) – Reprezentante negosiante faan nu’u, Salustiano Castro Pereira, husu Governu prepara fatin fiksu ida ba vendedór ambulante sira atu bele hala’o sira-nia atividade komérsiu ho seguru no organizada.
Salustiano hateten katak Diresaun Jestaun Merkadu Munisípiu Dili uluk promete atu prepara fatin permanente ba negosiante ambulante sira. Maibé to’o agora, promessa ne’e seidauk hetan realizasaun.
“Governu liuhusi Diresaun Jestaun Merkadu Munisípiu Dili promete prepara fatin fiksu ba ami negosiante ambulante atu bele faan ho seguru, maibé to’o agora seidauk realiza,” dehan Salustiano ba TATOLI iha Largo Lecidere, Dili, iha Kuarta.
Nia esplika katak tanba laiha fatin fiksu, maioria negosiante nu’u sira kontinua faan iha jardin no fatin públiku sira hanesan Largo Lecidere, Motael, Xanana Sport Center, Cristo Rei no fatin públiku seluk.
Tuir nia, situasaun ida-ne’e halo sira la sente seguru tanba ekipa konjunta SEATOU dala-barak haruka negosiante sira muda husi fatin hirak ne’ebé negosiante sira uza atu faan nu’u.
“Bainhira ekipa SEATOU mai, ami tenke halai buka fatin seluk atu salva ami-nia sasán. Karik lae, sira bele hadau ami-nia nu’u hotu. Ida-ne’e halo ami lakon tanba nu’u hirak ne’e ami sosa ho osan rasik atu faan fila fali no hetan lukru ki’ik deit ba sustenta moris,” nia dehan.
Salustiano hateten rendimentu negosiante nu’u sira la hanesan, tanba depende ba númeru konsumidór no sorte kada ema nian tanba ema barak mak faan nu’u iha Dili.
“Iha loron di’ak, negosiante ida bele hetan rendimentu entre $25 to’o $50 kada loron, no balu bele hetan liu hosi ne’e, depende ba númeru ema ne’ebé sosa.
Nia mós esplika katak maioria negosiante sira sosa nu’u husi vendedór sira ne’ebé lori produtu mai hosi munisípiu Lautém, Manufahi no balun husi Dili. Balu mós ba ku’u rasik husi nu’u na’in sira, ho folin $0,50 kada nu’u fuan ida, no depois faan fila fali ho folin $1.
Jornalista: Camilio de Sousa
Editór: Filomeno Martins
