DILI, 09 Jullu 2026 (TATOLI) – Atakante AS Marca, Gelvanio Alberto, sai éroi ba ninia klube hafoin konsege salva ekipa husi derrota liuhusi golu empata 1-1 hasoru FC Porto Taibessi, iha jogu kontinuasaun Liga Timorense 2026 ne’ebé hala’o iha Estádiu Munisipál Dili, kinta kalan.
Rezultadu fahe pontu ne’e seidauk lori mudansa boot ba klube rua nian, domin sira na’in-rua nafatin mós namlele iha tabela klasifikasaun provizóriu nia okos no kontinua hetan ameasa boot atu degrada ba segunda divizaun.
Dezde apitu primeiru, ekipa rua hatudu kedas jogu ne’ebé moris no soke malu liuhusi kontra-atake oioin. AS Marca ne’ebé mai ho tátika husi treinadór José Fonseca, fó presaun maka’as ho kbiit tomak hodi domina Porto Taibessi. Maske nune’e, eskuadra Taibessi la haraik-an, sira hatán fali liuhusi estratéjia bola aas hodi kria ameasa ba liña defeza Marca nian, maske liña kotuk Marca nian nafatin hamriik metin.
AS Marca joga ho pasiénsia hodi halo pasajen badak husi ain ba ain iha kampu-laran, hodi hein tempu ne’ebé loloos lahó ansi. Iha minutu 15, Marca hetan oportunidade primeira klase liuhusi suta livre Gelvanio nian, maibé bola semo aas de’it liu trave. Porto Taibessi ne’ebé joga ho kalma no unidu, konsege aproveita fali sela ne’ebé iha; iha minutu 22, avansadu Zardiel Piedade konsege fura rede hodi lori Taibessi mós lidera uluk ho eskor 1-0.
Golu ne’e obriga AS Marca atu reajusta sira-nia jogu hodi duni fali eskor. Sira nafatin hatudu fuan malirin no kontrola emosaun. Iha minutu 29, hafoin mosu situasaun barullu iha kaixa penalidade Taibessi nian, Gelvanio Alberto aproveita kedas oportunidade ne’e hodi lansa suta maka’as ne’ebé fura guarda-redes nia serbisu, hodi muda eskor ba empata 1-1, ne’ebé mantein to’o tempu deskansa.
Tama ba segunda parte, AS Marca tama ho motivasaun aas hodi duni vitória, maibé sira-nia kbiit nafatin soke fali liña defeza Porto Taibessi nian ne’ebé joga disiplina tebes no la fó espasu uitoan ba oponente. Iha sorin seluk, liña kotuk AS Marca nian mós hatudu kualidade defensiva ne’ebé di’ak hodi korta atake foun hotu husi Porto Taibessi. Tanba kbiit no dezempeñu ekilibradu tebes husi ekipa rua to’o apitu ikus lian, eskor hasees an husi mudansa no klube rua tenke simu de’it pontu ida-ida.
Jornalista: Hortêncio Sanchez
Editór: Rafael Ximenes de A. Belo
