KAFI seidauk halo avaliasaun ba konstrusaun ospitál andar 10 iha Ermera-Manufahi

DILI, 09 Jullu 2026 (TATOLI)—Prezidente KAFI no atuál Ministru Planeamentu Investimentu Estratéjiku, Gastão Francisco de Sousa, hateten KAFI liuhusi Konsellu Administrasaun Fundu Infrastrutura seidauk halo aprovasaun ba konstrusaun ospitál psikiatria andar 10 ho padraun intenasionál iha Munisípiu Ermera no Manufahi, tanba dezeñu tékniku seidauk detallu.

Notísia Relevante: KAFI seidauk halo avaliasaun ba konstrusaun ospitál andar 10 iha Ermera-Manufahi

“Polítika Governu Konstitusionál da-sia (IX) mak atu harii ospitál iha Timor-Leste, no konstrusaun ospitál munisipál rua no ospitál psikiatria ho padraun internasionál iha munisípiu, maibé KAFI seidauk halo aprovasaun orsamentu ba ida-ne’e, tanba presiza dezeñu prontu tiha lai,” Gastão Francisco de Sousa hateten ba Jornalista sira iha nia kna’ar fatin, Fatuhada, ohin.

Nia afirma, prioridade polítika husi Governu Konstitusionál da sia (IX), maibé prosesu implementasaun presiza tuir etapa téknika, tanba empreza ne’ebé hetan servisu sei kontínua halo Detailed Engineering Design (DED), ne’ebé sei sai baze importante atu KAFI bele avalia no aprova orsamentu ba konstrusaun.

“Dezeñu prontu tiha lai. Agora empreza sei halo DED, bainhira DED prontu tiha mak KAFI foin bele halo aprovasaun. Tanba, Governu sei asegura prosesu ne’e la’o ho baze téknika no planeamentu di’ak, tanba infraestrutura saúde hanesan investimentu importante ne’ebé presiza garantia kualidade no sustentabilidade,” nia esplika.

Antes ne’e, Ministra Saúde Élia dos Reis Amaral hateten, daudaun ne’e Ministériu Saúde prevene ona orsamentu ba iha kontrusaun ospitál munisípal ne’ebé kompostu husi Munisípiu Ermera no Manufahi.

“Ita prevee ona  orsamentu ba iha kontrasaun ospitál munisípal ne’ebé mak kompostu husi ospitál Munisípal Ermera ida-ne’ebé mak ita dehan katak padraun Internasionál no mós ospitál ba piskatria ne’ebé mak iha Gleno nian. Depois ba fali rai ospitál Munisípal Same iha Luak ne’ebé mak ita prevee orsamentu enfazeada pur períodu,” Élia dos Reis Amaral relata.

Nia haktuir, orsamentu ne’ebé mak Governu preve hamutuk millaun $18 ba kontrusaun ospitál sira ho padraun internasionál tanba ne’e prosesu daudaun ne’e la’o hela.

“Ita koloka ona millaun $18 ba ospitál Munisipál sira-ne’ebé mak atu hanesan padraun Internasionál nian. Iha prosesu nian laran, ita-boot sira hatene no agradese tanba komunidade entrega ona rai ne’ebé mak atu halo ba Kontrusaun ospitál rasik. Agora daudaun prosesu dezeñu la’o hela ita hein katak sei ramata, ita hahú kontsrusaun,” nia dehan

Nia informa, ospitál tolu ne’e sei halo kontrusaun dala ida de’it tanba pakote ne’ebé sei dezeñu, tanba tolu ida iha Munisípiu Manufahi no rua iha Munisípiu Ermera.

“Hafoin dezeñu ospitál tolu ne’e sei halo hanesan ida Luak, Munisípiu Manufahi, depois ba iha Ermera nian iha Dukurai no Glenu, no tolu ne’e neste momentu halo hela dezeñu, depois ramata mak ami sei informa fila-fali,” nia dehan.

Elia hateten, kona-ba halo lansamentu espera katak bele halo tempu badak tanba sei dezeñu hotu mak hafoin halo lansamentu.

“Mai ita espera katak simu, bele iha tinan ida-ne’e maibé ha’u labele dehan la’o komforme dezeñu hotu ami bele termina, ba data lansamentu nian,” nia dehan.

Jornalista : Felicidade Ximenes

Editór        : Cancio Ximenes