BOBONARU, 09 Jullu 2026 (TATOLI) – Sentru saúde no postu saúde sira iha postu administrativu Kailaku falta rekursu umanu, liuliu ba parteira no médiku, ne’ebé afeta ba atendimentu saúde komunitária.
Xefe Sentru Saúde Komunitária (SSK) Kailaku, Lourenço Moniz, dehan maski ekipa saúde kontinua implementa atividade Promosaun Integradu Saúde (PIS) no Mobile Clinic (MC) iha kada fulan no fornese konsulta loron-loron iha sentru saúde, falta pesoál saúde nafatin sai dezafiu boot.
“Postu saúde balun laiha parteira, enfermeiru de’it mak iha. Bainhira iha kazu partu ka inan isin-rua ho komplikasaun ami tenke transfere bá maternidade iha sentru saúde atu hetan atendimentu apropriadu ba inan no bebé”, Lourenço dehan.
Tuir nia, Sentru Saúde Kailaku hamutuk ho postu saúde sira iha instalasaun saúde hamutuk sanulu, maibé médiku ne’ebé disponivel iha de’it na’in-tolu, no hotu-hotu serbisu iha sentru saúde. Enkuantu postu saúde sia seluk seidauk iha médiku no maioria pesoál destakadu na’in-ida de’it iha kada postu.
“Ami iha fasilidade saúde sia, maibé dalaruma mós pesoál saúde ne’ebé destakadu ne’e ema ida de’it, entaun iha kazu emerjénsia, kolega ne’e bá tiha fatin seluk, ida-ne’e mós difikulta ami atu halo atendimentu ne’ebé másimu”, nia realsa.
Iha fulan-Juñu, Ministériu Saúde destaka ona parteira foun na’in-haat ba postu saúde Atudara, Genulai, Goulolo no Da-Udu. Dirijente ne’e husu mós atu aumenta pesoál apoiu hanesan jardineiru no pesoál limpeza.
Notísia relevante: Falta pesoál saúde obriga parteira hala’o knaar oioin iha postu Manapa
Relasiona ho moras, Kailaku rejista husi Janeiru to’o Juñu 2026 Infesaun Sistema Respiratóriu Agudu (ISPA) hamutuk 1.727, diarreia 564. Enkuantu moras seluk hanesan turberkuloze (TB) no dengue menus.
SSK Kailaku mós enfrenta problema falta stock ba teste rápidu HIV, malária no sifílis, tanba distribuisaun husi nivel munisípiu no nasionál seidauk to’o. Enkuantu ai-moruk esensiál kontinua distribui regularmente tuir nesesidade kada fulan no trimestre.
Notísia relevante: SSK Kailaku rejista pasiente tuberkuloze 19
Jornalista: Sergio da Cruz
Editora: Maria Auxiliadora
