DILI, 09 Jullu 2026 (TATOLI)—Primeiru-Ministru, Kay Rala Xanana Gusmão, rekomenda ba Ministériu Defeza espesialmente na FALINTIL-Forsa Defeza Timor-Leste (F-FDTL) atu labele asegura de’it seguransa interna maibé garante mós protesaun sivíl ba komunidade sira bainhira hetan deszastre naturá ruma.
Primeiru-Ministru, Kay Rala Xanana Gusmão, hafoin partisipa iha serimónia asinatura husi Lisensing (OHS) ho multisetorál sira iha Governu, iha otél novu turizmu Lesidere, ohin.
Primeiru-Ministru, Kay Rala Xanana Gusmão, dehan hanesan problema boot ida iha Filipina husu F-FDTL atu ba apoiu emerjénsia maibé to’o ikus kanseladu tiha ne’e, entaun F-FDTL ne’e prepara-an ba saida atu prepara-an ba funu iha Ukránia ka Iraun ka Gaza ka ba iha ne’ebé
“Ema haruka dehan sira atu prepara-an atu haree, hakbesik-an ba povu bainhira povu presiza duni, lae ita haree mak kaer kilat boot boot de’it ho motor boot uza farda kompletu (uniforme) ba Metinaru fila=fali mai,” Primeiru-Ministru, Kay Rala Xanana Gusmão, hateten iha otél Novu Turizmu, ohin.
Xefe Governu hatutan, Governu ko’alia tiha ona iha konsellu ministru rasik katak Timor-Leste sai ona membru ASEAN no mosu dezastre naturiál barak iha ASEAN, entaun atu Timor-Leste haruka ema atu ba ajuda di’ak liu instituisaun hanesan F-FDTL lori prepara halo instituisaun balun ba maibé ikus kansela.
“Tanba ita atu kria pás iha mundu, pás ne’e mai husi kontaktu forsa ho populasaun ne’ebé presiza. Ha’u hatene, imi ne’e la’ós akompaña facebook de’it maibé imi akompaña mundu, hanesan foin dadauk ne’e akontese rai nakdoko iha fatin barak no Portugál haruka militár sira ba salva ema sira-ne’ebé loron haat ka lima (terjebak) iha rai-okos maibé sira konsege moris,” PM Xanana haktuir.
Líder nasionál ne’e deklara, bainhira iha diskusaun ne’e nia haree ba PNTL (Ministériu Interiór) nian iha ne’e maibé F-FDTL (Ministériu Defeza) nian laiha, tanba programa OHS ne’e prepara atu ema ema labele invade fali Timor-Leste
“Hanesan foindauk inundasaun maka’as iha Kaikoli, hamoos, k’e no suru rai sira-ne’e hotu, husu partisipasaun husi forsa, entaun ami kee rai hela sira dehan Primeiru-Ministru F-FDTL to’o ona. Ha’u haree kamioneta rua, ha’u dehan ne’e ohin loron ita hamoos hotu. Ha’u tuur hela, forsa sira haksoit tuun hotu ho kilat, ha’u dehan, oh, imi mai ho kilat ka, entaun imi ba tiru bee ne’e hodi bee ne’e halai tuir nia dalan, entaun sira moe tiha sira fila-fali ba,” nia dehan.
Nune’e, nia dehan, diskusaun sira-ne’e hotu ohin temi dehan protesaun sivíl ne’e prepara nafatin atu iha kbiit atu to’o ba, lori povu Timor-Leste nia naran hodi ajuda ema seluk.
“Maibé ita tenke iha esperiénsia iha ne’e, lae ita iha ne’e mak dehan ha’u forsa forsa, ó halo de’it saida, ó atu halo saida,” nia dehan.
Jornalista : Alexandra da Costa
Editór : Cancio Ximenes
