VIKEKE, 10 Jullu 2026 (TATOLI)—Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo, husu atu Ajénsia TATOLI, Institutu Públiku (TATOLI, I.P.) nia aniversáriu ba da-X ne’e atu servisu ho profisionál no hato’o informasaun ho tranparente ba públiku.
“Ha’u sente TATOLI, I.P. nia ezisténsia ba da-X ne’e, bá-oin TATOLI mantein servisu ho profisionál atu labele haliis ba partidu A, B no C, hodi garante transparénsia informasaun ba públiku, TATOLI nafatin hakbesik an ba ami autoridade lokál sira atu ami bele hato’o povu nia preokupasaun sira ba Governu hodi tau-atensaun,” José ba TATOLI iha Postu Uatukarbau, Sesta ne’e.
Nia haktuir katak durante ne’e TATOLI, I.P. destaka jornalista iha Munisípiu Vikeke kolabora ho autoridade la’o di’ak, nune’e mós komunikasaun entre autoridade ho TATOLI la’o di’ak tebes.
“Durante ne’e ami-nia kolaborasaun ho TATOLI di’ak tebes, tan ne’e mak ami sempre fó-sai populasaun nia preokupasaun iha Ajénsia TATOLI. Ita kompara ho tinan hirak liubá, problema sira iha aldeia, suku no Postu Uatukarbau ami labele publika sai iha mídia, maibé agora iha ha’u-nia mandatu ne’e ami hetan problema husi populasaun, ami bele hato’o ba TATOLI no TATOLI sempre fó-sai ami-nia populasuan nia prokupasaun. Tan ne’e, aniversáriu TATOLI ba da-X ne’e ami autoridade komunitária hakarak hato’o agradesimentu ba TATOLI no ami sente kontente tanba durante ne’e apoia tebes ami ba tranzmisaun informasaun sira husi baze,” nia hato’o.
Iha fatin ketak, Abitante Vikeke, André da Costa Tavares, sente orgullu tebes ho servisu Ajénsia TATOLI ne’ebé ninia ezisténsia ba da-X ona.
“Husi TATOLI ezisténsia ida-ne’e rasik kuaze kontribui ona ba prosesu dezenvolvimentu lubuk ida, liuliu iha área mídia nian hodi tranzmite informasaun interasante sira ba públiku. Ami povu ho esperansa tomak nafatin tau konfiansa ba TATOLI nia servisu hodi tranzmite informasaun importante sira ba públiku. Ho selebrasaun aniversáriu ne’e, ami sujere ba Konsellu Diretivu TATOLI atu aumenta ninia rekursu liuliu iha ekipamentu sira hanesan kamera, karreta no rekursu seluk, nune’e bele fasilita servisu jornalista sira iha baze hodi has’ae kualiadade serbisu ho di’ak liután iha área remota sira,” nia sujere.
Jornalista: Vitorino Lopes da Costa
Editór: Xisto Freitas da Piedade
