OEKUSI, 09 Jullu 2026 (TATOLI) – Dili Institutue of Tecnology Kampus Rejionál Oekusi (DIT-KREO), kinta ne’e, realiza feira empreendedorizmu atu promove estudante sira-nia kreativu ba vida negósiu inovativu, ne’ebé hala’o durante loron rua iha Jardín Koreanu Oébau ho tema ‘joventude kreativu no negósiu inovativu’.
Iha ámbitu sesaun abertura, Diretór DIT-KREO, João Muni esplika katak programa ne’e nia objetivu atu promove setór privadu hahú husi joven sira-ne’ebé hetan edukasaun naton iha saladeaula. Atividade ne’e mós hanesan atu koko, implementa akordu MoU ne’ebé DIT ho Autoridade RAEOA ba Programa Movimentu Empreendedorizmu Oekusi.
“Orgullu tebes tanba ami foku no konsege hahú buat ki’ik ida. Ami la moe no la ta’uk no ami la hakfodak. DIT-KREO hamriik iha tinan-24 ona, idade hanesan nasaun Timor-Leste, ha’u hatene katak sira-ne’ebé ohin tuur iha oin, mesak dosente sira-ne’ebé fó esforsu tomak no sira hanesan alumni sei suporta to’o ohin loron,” nia hateten iha sesaun abertura feira hala’o iha Jardín Koreanu Oébau, kinta ne’e lorokraik ne’e.
Notísia relevante:RAEOA ho DIT selebra akordu dezenvolve turizmu no kapasita rekursu umanu
Autoridade akademika ne’e, relembra katak baibain DITKREO koko ona implementa atividade sira seluk, hanesan desportu, debate públiku, workshop no semináriu, maibé tinan ne’e liuhusi unidade kurrikulár dixipliña empreendedorizmu (kewirausahaan), estudante semester lima no hitu husi jestaun jerál, koko aplika teória ne’ebé hetan iha aula ho atividade mini-feira ne’e, no hetan apoia másima husi Autoridade RAEOA, alumni inklui setór privadu sira, tantu finanseira no materiál.
Dirijente ne’e fundamenta, kona-ba tema ne’ebé hili iha feira empreendedorizmu ne’e maka ‘Juventude kreativu no negósiu inovativu’, joventude ne’ebé kreativu katak juventude ne’ebé brani koko, brani halo no moe no brani tauk tanba seidauk koko implementa iha sosiedade nia leet.
“Maibé sira inovativa, tanba buat balun iha tiha ona, entaun koko atu muda no hasa’e hodi aprezenta, ne’e duni joventude iha kampus bele garantia sira-nia moris ba futuru no mentalidade iha setór merkadu nian, bainhira ramata sira-nia estudu bele aplika,” nia afirma.
Notísia relevante:Autoridade RAEOA konvida DIT integra aan iha Programa empreendedorizmu dezenvolve turizmu
Sekretáriu Rejionál ba Asuntu Administrasaun no Finansa, Salvadór da Cruz, reprezenta Prezidente Autoridade RAEOA, konsidera feira empreendedorizmu ne’e nu’udar asaun konkreta husi estudante sira atu hatudu prátika iha hafoin hetan teória iha universidade.
“Ida-ne’e hatudu espiritu, sira-nia matenek, jestu ida-ne’e nu’udar bukae ida ba sira, bainhira akaba estudu iha ensinu superiór bele kria rasik kampu traballu liuhusi kreativu inovasaun la presiza ba setór públiku Governu nian. Ne’ebé, atividade ne’e mós iha relasaun ho Programa Movimentu Empreendedorizmu Oekusi, katak promove produtu rai-laran atu dezenvolve ita-nia ekonómia, tanba estudante maka futuru nasaun nian, entaun hahú agora prepara-an ba futuru,” nia hateten.
Notísia relevante:Atualiza progresu, ANAAA halo re-akreditasaun institusionál daruak ba kampus DITKREO iha Oekusi
Observasaun Jornalista Ajénsia Tatoli,I.P, durante feira ne’e, estudante sira aprezenta produtu lokál sira ho inovasaun sai produtu modernu ba fabrikadu nian hanesan, ai-farina, fehuk, talas, lakeru inklui ai-han tasi-nian no seluktan.
Entretantu, estudante sira-ne’ebé partisipa iha feira empreendedorizmu ne’e mai husi departamentu jestaun jerál iha grupu lima, jestaun finansa grupu ida, inklui grupu komunidade ida husi suku Taiboko hodi promove taís Oekusi nian.
Jornalista: Abílio Elo Nini
Editór: Rafael Ximenes de A. Belo
