Komisaun A hakarak halo estudu komparativu ba implementasaun Lei Sibernétika iha Filipina
DILI, 10 Jullu 2026 (TATOLI)-Komisaun A ne’ebé Trata Asuntu Konstitusionál no Justisa iha Parlamentu Nasionál tau ona ajenda iha fulan-Agostu tinan ne’e halo estudu komparativu iha Filipina hodi haree referénsia no implementasaun kona-ba Lei Sibernétika.
Prezidente Komisaun A, Natalino dos Santos, esplika katak hili Filipina tanba nu’udar país membru Asosiasaun Nasaun Sudeste Aziátiku (ASEAN, sigla inglés) ne’ebé konsege halo ona ratifikasaun ba Konvensaun Budapeste ka Sibernétika.
Estudu ne’e ho objetivu atu buka esperiénsia, koñesimentu no abilidade relasiona ho hamosu Lei Sibernétika hodi sai referénsia ba membru órgaun lejizlativa sira bainhira halo diskusaun no aprovasaun.
Tuir planu, Komisaun iha fulan-Setembru tinan ne’e sei realiza semináriu internasionál kona-ba Lei Sibernétika hodi konvida peritu sira no rona sira-nia hanoin. “Tanba mosu ezijénsia barak, lalais ona halo Lei Sibernétika”, nia hateten.
Lejizlasaun ne’e importante tebes ba prosesu transformasaun dijitál no seguransa iha setór dijitál nian.
Nune’e mós atu regula utilizadór mídia sosiál balun, ne’ebé uza identidade falsa hodi ataka ema seluk ho linguajen la edukativu, ne’ebé sai preokupasaun boot no hatudu lakon morál iha sosiedade ne’ebé nakonu ho valór kulturál no relijiaun oioin.
Notísia relevante: PJR rekomenda Parlamentu fó prioridade ba aprovasaun Lei Sibernétika
Jornalista: Nelson de Sousa
Editora: Maria Auxiliadora
