DILI, 10 Jullu 2026 (TATOLI)-Ekonomista Rui Gomes fó rekomendasaun neen ba Ajénsia Notisioza Timor-Leste Tatoli, I.P., ne’ebé selebra nia ezisténsia ba da-X (Jullu 2016-Jullu 2026).
Nia dehan katak Tatoli iha nia signifikadu importantes, katak “fahe informasaun ba ema seluk atu lori tutan ba oin”. Tuir nia, ho prezensa Tatoli eleva padraun komunikasaun sosiál Timor-Leste durante tinan sanulu nia ne’e.
Rui Gomes subliña Tatoli katak mandatu ajénsia ne’e mak sai fonte informasaun ofisiál ba públiku iha nivel nasionál, rejionál no internasionál. Durante nia ezisténsia iha tinan sanulu nia laran, Tatoli kontinua uza lia-portugés, inglés, indonézia, no tetun, no prodús konteúdu iha forma testu, foto, no video.
“Tatoli halo ona buat ida ne’ebé importante ba ambiente informasaun nasaun foun ida nian. Ida ne’e la’ós buat ki’ik”, Rui Gomes dehan via telefone.
Rui Gomes subliña katak mandátu TATOLI mak sai fonte informasaun ofisiál ba públiku iha nível nasionál, rejionál no internasionál. Durante nia operasaun iha tinan sanulu nia-laran, TATOLI kontinua uza lian Portugés, Inglés, Indonézia no Tetun, no produz kontiudu iha forma testu, foto no vídiu.
Nia refere mós deklarasaun husi eis-Prezedente Konsellu Diretivu Tatoli, José da Costa, iha Programa Talk Show aniversáriu iha fulan-Jullu ne’e hateten katak dezafiu sentrál ne’ebé Tatoli hasoru mak oinsá manán no hametin konfiansa públika atu rona-na’in sira akompaña no haree Tatoli ho konsisténsia.
“Ida-ne’e hatudu katak instituisaun ne’e harii ona infraestrutura no alkansa buat boot, maibé parte ne’ebé difísil liu mak oinsá sai outlet informasaun ne’ebé públiku fiar no uza beibeik nu’udar fonte kredivel”, nia dehan.
Tuir Rui Gomes, liafuan hirak ne’e importante atu haree ho sériu, tanba kredibilidade mak fatór determina futuru Ajénsia Notisioza Estadu nian.
Nia mós hateten katak Tatoli hetan finansiamentu husi Orsamentu Jerál Estadu, tanba ne’e konfiansa públika la’ós deit kona-ba informasaun loloos (accurate), maibé mós kona-ba independénsia ne’ebé públiku espera atu instituisaun ne’e mantein.
“Oinsá Tatoli jere tensaun ida-ne’e iha dékada oin sei determina se públiku haree Tatoli hanesan ajénsia notisia nasionál ne’ebé kredivel ka sai de’it kanál komunikasaun Governu nian”, nia haktenik.
Relasiona ho kestaun kredibilidade no dezenvovlimentu institusionál, Rui Gomes fó rekomendasaun neen: Lideransa no funsionáriu tomak Tatoli presiza tau konfiansa públika hanesan alvu klaru, la’ós rezultadu sekundáriu ida; Hatudu vontade klara atu relata buat ne’ebé de’it maski podér ezekutivu la sente konfortavel. La iha buat ida ne’ebé bele harii konfiansa iha ajensia Estadu nian lais liu fali duké hatudu independénsia editoriál, liuhusi istória loloos, maski istória ki’ik ida.
Aleinde ne’e adapta ho kuidadu intelijensia artifisiál (IA) no ferramenta dijitál ruma, ho transparensia kona-ba saida mak IA ajuda halo; ekipa Tatoli nian rasik hatudu ona preokupasaun ida-nee iha selebrasaun aniversáriu, no buka regra klara sedu sei importante liu fali duké halo sasán lais de’it; Investe iha karreira jornalista sira-nian, nune’e koñesimentu instituisaun nian la halai sai husi Tatoli ba mídia seluk ka organizasaun sosiedade sivíl ne’ebé selu saláriu di’ak liu.
Sujestaun tuirmai mak labele haluha públiku iha área rurál no sira ne’ebé moris fora husi Dili. Estratéjia dijitál uluk ida iha risku atu husik hela leitór sira neebé ajénsia nasionál ida tenke alkansa no ikus mak kontinua habelar papél ajénsia iha nivel rejionál/internasionál nian atu sai fonte ne’ebé jornalista estranjeiru sira sita bainhira kobre kona-ba Timor-Leste, tanba ida-ne’e mak realístiku no valór aas ba ajénsia ida hanesan Tatoli.
Tuir nia, Tatoli kontinua halo serbisu habelar informasaun iha lian haat no da-nee louva tanba, ba nasaun ki’ik ida ne’ebé sei harii nia instituisaun mídia husi baze, maka konkista boot ida ne’e merese rekoñese.
” Ha’u atu hatete mós ho loloos katak, ha’u ema ida ne’ebé laiha koñesimentu diretu kona-ba serbisu jornalista sira-nian. Ha’u la’ós analista mídia ida, entaun ha’u-nia haree husi ema li’ur ne’ebé iha informasaun kona-ba buat ne’ebé públiku mós bele haree hela iha sistema imprensa Timor-Leste nian. Ha’u hato’o ha’u-nia votu susesu ba funsionáriu Tatoli tomak no bom trabalho”, nia konklui.
Notísia relevante: Deputadu sira husu Tatoli hato’o informasaun imparsiál
Jornalista: Arminda Fonseca
Editora: Maria Auxiliadora
