DILI, 11 Jullu 2026 (TATOLI) – Klubu basketeból Santo António Manatutu termina jornada dahuluk Liga Nasionál Basketeból Timor-Leste ho vitória, depoizde ekipa feto no mane manán iha jogu ohin ne’ebé realiza iha Jináziu Dili, sábadu ne’e.
Ekipa mane halakon Brotherhood ho pontu 78-36, enkuantu feto halakon Lemocor ho pontu 53-42.
Iha kompetisaun ekipa mane, Santo António Mantutu hatudu dominasaun husi inísiu jogu. Halo atake ne’ebé di’ak no defeza metin halo Brotherhood labele dezenvolve nia ritmu jogu. Santo António hahú loke diferensa iha kuarter daruak no kontinua aumenta pontu iha kuarter datoluk no dahaat.
To’o apitu finál, Santo António manán ho 78-36, halo diferensa pontu 42, ne’ebé sai hanesan vitória boot liu iha jornada dahuluk Liga Nasionál Basketeból ne’e. Vitória ne’e hatudu efisiénsia ekipa iha aspetu ofensivu no defensivu.
Iha parte seluk, ekipa feto Santo António Manatutu mós hetan vitória importante hafoin halakon Lemocor ho pontu 53-42.
Jogu ne’e la’o ho intensa husi kuarte dahuluk. Lemocor konsege akompaña ritmu Santo António to’o jogu remata iha kuarte daruak, nune’e diferensa pontu sei ki’ik.
Maibé, tama iha kuarter datoluk sai momentu determinante ba Santo António. Ho movimentasaun bola ne’ebé di’ak, atake koletivu no remata tripla balun, ekipa ne’e konsege loke diferensa pontu to’o 11.
Maski Lemocor tenta luta to’o minutu ikus, Santo António hatudu defensa metin no aproveita oportunidade husi pontu livre sira atu asegura vitória.
Ho rezultadu sira ne’e, ekipa Santo António Manatutu hahú kampaña liga Nasionál Basketeból Timor-Leste ho konfiansa aas no prova katak sira-nia ekipa iha konsisténsia no hametin pozisaun iha klasifikasaun. Ekipa feto no mane ne’e tenke tau atensaun iha liga tinan ida-ne’e.
Notísia relevante: LNBTL reativa hafoin tinan sanulu para, Madalena Carlos asume prezidénsia liga
Jornalista: Hortêncio Sanchez
Editora: Maria Auxiliadora
