DILI, 12 Jullu 2026 (TATOLI)- Tribunál Judisiál Primera Instánsia Dili (TJPID), liuhusi despaxu ba prosesu primeiru interrogatóriu, deside aplika medida tolu ba arguidu na’in-27, ba kazu jogu online Scamming Call Center Metiaut, iha kinta (09/07) ne’e.
Iha despaxu ne’e, Juiz José Maria de Araújo deside aplika medida tolu ba iha arguidu na’in-27. Medida sira ne’e mak Termu Indentidade Rezidénsia (TIR), Proibisaun de Auzensia, no Kauzaun kada arguidu $3.000.
Iha alegasaun husi Ministériu Públiku (MP) ne’ebé reprezenta husi Prokuradór Rafael Gusmão alega katak ba arguidu ne’ebé envolve iha kazu scaming online Metiaut ne’e Tribunál tenke aplika medida rua ba mak kauzaun kada ema ida ho osan $2.500, no mós medida Proibisaun Auzénsia.
Aleinde ne’e, husi parte defeza sira-nian, aseita ho alegasaun MP nian.
Entretantu, arguidu na’in-27 ne’e, Ministeriu Públiku promove ho krime Burla Informátika, Asosiasaun Kriminoza, no jogu ilísitu.
Prosesu interrogatóriu dahuluk ne’e prezide husi Juiz José Maria, Ministériu Públiku (MP) reprezenta husi Prokuradór Rafael Gusmao. Arguidu sira hetan asisténsia legál husi Advogadu Privadu, Januário Martins, Octávio Cardozo, Adelina Meluk, no José Ximenes.
Notísia relevante3 Tribunál aplika kauzaun $2.500 ba arguidu na’in-28 ba kazu scam call centre iha Manleuna
Jornalista: Natalino Costa
Editora: Maria Auxiliadora
