Jornalista na’in-25 partisipa formasaun transformasaun dijitál iha Xina durante semana tolu
DILI, 13 Jullu 2026 (TATOLI)–Sekretáriu Estadu Komunikasaun Sosiál, Expedito Dias Ximenes, Segunda ne’e, halo serimónia despedida ba jornalista na’in-25 ne’ebé sei tuir formasaun iha Xina durante semana tolu.
Serimónia ne’e akompaña direta husi Prezidente Konsellu Diretivu Ajénsia Notisioza Timor-Leste, Institutu Públiku – TATOLI, I.P, Noémio Mateus Soares Falcão no Prezidente Konsellu Administrasaun Rádiu Televizaun Timor-Leste, Empreza Públika (RTTL, E.P), Rosário da Graça Maia .
Jornalista sira ne’e mai husi Ajénsia TATOLI, I.P na’in-hitu, RTTL, E.P na’in-14, inklui mídia privada hanesan Timor Post ida, TVe ida Lafaek News ida, Sap News ida, Dili Post ida no SMNews ida.
Sekretáriu Estadu Expedito hateten, jornalista sira ne’e tuir planu iha loron 14 Jullu sei halo viajen ka jornalizmu tour bá Bejing, Xina.
“Programa ne’e serbisu hamutuk entre Embaixada Xina iha Timor-Leste. Sira hela iha Xina durante semana tolu nia laran tuir treinamentu no semináriu relasiona ho transformasaun dijitál no koverjénsia mídia, ne’ebé sei fó durante sira-nia treinamentu iha Beijing. Profesór ne’ebé iha esperiénsia sei fó matéria barak iha área jornalizmu no halo esplikasaun,” Expedito Dias hateten ba Jornalista sira iha Palásiu Governu, Segunda ne’e.
Notísia relevante : Jornalista na’in-19 tuir formasaun kona-ba hakerek notísia ‘feature’
Governante ne’e dehan, formadór husi editór señór sira husi Ajénsia Xina hanaran Xinhua nomós iha diáriu barak mak sei ajuda atu fó sira-nia koñesimentu kona-ba prosesu dijitalizasaun no mídia dijitál ne’ebé daudaun la’o iha mundu.
“Ha’u ohin fó mensajen ba jornalista sira ne’e atubele hatudu nafatin sentimentu ka atu buka apreende no halo diskusaun bainhira la kompreende iha matéria sira ne’ebé hato’o husi dosente sira iha treinamentu nomós hatudu nafatin étika no disiplina hodi bele tuir treinamentu jornalizmu ho di’ak,” nia akresenta.
Expedito husu benefisiáriu programa, bainhira filafali mai bele mós fahe esperiénsia ne’ebé hetan ba kolega sira seluk ne’ebé laiha oportunidade, atu nune’e bele motiva esperiénsia iha kapasidade profesionál jornalizmu nian.
Nia dehan, relasaun entre Xina ho Estadu Timor-Leste liuhusi área komunikasaun sosiál liliu ba formasaun sira hanesan ne’e la’o tanba implementasaun husi akordu ne’ebé tinan-rua liubá asina iha Beijing bainhira vizita Prezidente Repúblika José Ramos- Horta.
“Ha’u ho eis Prezidente RTTL no TATOLI simu Xina média group hodi implementa ba programa ida-ne’e,” nia katak.
Iha sorin seluk, Xefe Redasaun SMNews, Remisia Teresa Boavida, agradese ba oportunidade ne’e.
“Ida-ne’e hanesan oportunidade di’ak ida ba mídia hotu tanba husi biban ida-ne’e lori ita hatene liután, koñese liután dezenvolvimentu dijitál ne’e to’o iha ne’ebé no depois hadi’a di’ak liután mídia ninia ezisténsia iha ámbitu Timor-Leste adaptasaun ho globalizasaun daudaun ne’e,” nia hato’o.
Jornalista : Natalino Costa
Editora : Julia Chatarina
