DILI 13 Jullu 2026 (TATOLI)—Ministériu Edukasaun (ME), apresia ho estudante husi Eskola Ensinu Báziku (EBC-sigla portugeza) Colegio Paulo VI, EBC São José Operário, EBC Bidau Akadiruhun, EBC 30 de Agostu, EBC São Pedro, EBC Esperança da Pátria, reprezenta Timor-Leste iha kompetisaun ASEAN Three Plus Junior Science Odyssey, ne’ebé hala’o iha Clark Freeport Zone, Pampanga, Filipinas, durante semana ida (06-10/07/2026).
Ministra Edukasaun, Dulce de Jesus Soares, fundamenta eventu referidu reúne estudante, manorin sira no reprezentante hosi nasaun sira iha rejiaun ASEAN+3 atu partilla koñesimentu, dezenvolve kapasidade sientífika, kriatividade no inovasaun, no mós hametin kolaborasaun iha área siénsia no sustentabilidade.
“Evidénsia ida-ne’e hatudu ba ita dala rua ona. Ita-nia oan sira balun iha fulan hirak liubá ba tuir kompetisaun mmatemátika iha Kambodia ne’e mós hetan prémiu. Ohin imi na’in-neen (6) mós filamai ho rezultadu ne’ebé di’ak,” nia dehan liuhusi nia diskursu, iha sala konferénsia ME, Vila Verde, Segunda ne’e.
Ministra Dulce konsidera eventu ne’e hanesan jornada dahuluk ba estudante na’in-neen atu koko sira-nia matenek, maibé sira-nia dalan sei naruk.
Nia relata delegasaun Timor-Leste ne’ebé reprezenta Timor-Leste kompostu husi Alandrinho Corbafo Caunan (Colegio Paulo VI), Angélica da Costa Sequeira (EBC Bidau Akadiruhun), Mendelina del Carmen Mascarenhas (EBC 30 de Agostu), Nélia Patrício Soares (EBC São Pedro), Peter Carlos Chima Anaje (EBC São José Operário), Salvador da Costa Pacheco (EBC Esperança da Pátria)
Iha The 11th ASEAN+3 Junior Science Odyssey, delegasaun Timor-Leste hetan rezultadu di’ak ho konkista sira hanesan:
- APT-JSO Grand Awards
* 1 Medalla Ouro
* 3 Medalla Prata
* 2 Medalla Bronze
- Excellence Awards / Prémiu Espesiál
Delegasaun Timor-Leste mós hetan rekoñesimentu espesiál liuhusi:
- Best in Estimating Carbon Footprint
- Best in Wings of Chance Challenge
- Katuklas Excellence Award – ba deskobrimentu sientífiku ne’ebé foun no orijinál.
- Kaugnay Excellence Award – ba exelénsia iha serbisu hamutuk no respeitu ba kultura.
- Kaisa Excellence Award – ba advokasia ne’ebé forte ba asaun klimátika.
Portantu, Kaugnay Excellence Award ba eselénsia iha serbisu hamutuk no respeitu ba kultura. Kaisa Excellence Award ba advokasia ne’ebé forte ba asaun klimátika signifikadu Katuklas, Kaugnay no Kaisa Katuklas (deskobrimentu) reprezenta espíritu investigasaun no buka koñesimentu foun liuhusi siénsia no inovasaun.
Rekoñesimentu Kaisa (unidade) reflete unidade no solidariedade iha hametin kooperasaun internasionál iha área edukasaun no siénsia.
Tan ne’e, Ministériu Edukasaun fó apresiasaun ba estudante sira, professora mentora no parte hotu ne’ebé kontribui ba susesu Timor-Leste iha The 11th ASEAN+3 Junior Science Odyssey.
“Partisipasaun ida-ne’e sai inspirasaun atu kontinua hametin edukasaun sientífika, inovasaun no preparasaun estudante sira ba futuru,” nia dehan.
Enkuantu, profesora ne’ebé akompaña delegasaun estudante sira mak hanesan Alegrina de Jesus no Helena de Sousa Amaral.
Profesór husi EBC Esperança da Pátria, Helena de Sousa Amaral, sente orgullu tanba bele hetan oportunidade husi ME, hodibele partisipa iha eventu rejionál ida-ne’e.
“Ami bele troka hanoin ba malu ho nasaun sira seluk ne’ebé partisipa iha eventu referidu,” nia subliña.
Iha sorin seluk, Reprezentante Estudante husi EBC Esperança da Pátria Bekora, Salvador da Costa Pacheco, senete orgullu tanba bele lori Timor-Leste ba mundu.
“Ida ne’e hatudu katak Timor-Leste mós bele, maski ema haree ita hanesan nasaun ki’ik ida-ne’ebé foin ukun-an,” nia katak.
Salvador enkoraja estudante sira seluk atu labele okupadu liu ba halimar, maibé tenke estuda maka’as.
Jornalista: Osória Marques
Editór: Xisto Freitas da Piedade
