DILI, 13 Jullu 2026 (TATOLI)-Prezidente Parlamentu Nasionál, Maria Fernanda Lay, informa katak nia suspende diskusaun kona-ba proposta Lei Kriminaliza Difamasaun no Injúria iha faze jeneralidade, ne’ebé tuir planu atu debate iha plenária iha semana kotuk.
“Suspende tanba to’o ona iha Prezidente Parlamentu Nasionál ha’u haree katak sira-nia pareser balu la haree ba kontestu lei ita-nia rai-laran. Tanba ne’e mak suspende nia debate jeneralidade iha plenária ba semana kotuk”, Maria Fernanda Lay hateten hafoin enkontru ho Prezidente Repúblika, José Ramos-Horta, iha Palásiu Prezidensiál, Bairu Pité, Dili, ohin.
Tuir nia, suspensaun ne’e halo hodi hadi’ak liután proposta lei ne’e no asegura katak nia tuir normál legál lei ne’ebé vigora iha ai-laran.
Nia hateten katak durante enkontru ne’e hato’o mós preokupasaun Prezidente Repúblika nian kona-ba impaktu lei ne’e ba atividade jornalístika sira. “Ha’u dehan krítika la hanesan ho difamasaun. Krítika ita bele Kritika, ezemplu hanesan Prezidente Repúblika nia halo nia papél la loos liga ho lei ita krítika, maibé liga ho aktu ne’ebé seidauk iha evidénsia ne’ebé Tribunál deside katak nia kulpa, ita ba julga ne’e hanoin la loos”, nia dehan.
Nia salienta katak molok julga ema, tenke respeitu uluk nia direitu nu’udar sidadaun. Timor-Leste promove direitu umanu, maibé, maibé difamasaun kontra ema seluk bele konsidera hanesan violasaun ba direitu ema nian.
“Tanba ne’e mak ha’u husu ba jornalista sira-nia kaneta, labele julga ema iha prasa, ida-ne’e mak di’ak no profisionál”, katak.
Relasiona ho pozisaun Prezidente Repúblika ne’ebé antes ne’e diskorda ba proposta Lei Kriminaliza Difamasaun no husu atu Parlamentu Nasionál retira tiha lei ne’e, Fernanda Lay dehan katak opiniaun ne’e nu’udar kompeténsia Prezidente Repúblika no konsidera normál, tanba halo lei tenke rona parte hothotu.
Notísia relevante: https://tatoli.tl/2026/07/02/diskusaun-jeneralidade-ba-lei-kriminaliza-difamasaun-ajenda-ba-semana-oin/
Jornalista: Arminda Fonseca
Editora: Maria Auxiliadora
