Santa Cruz halakon Portu Taibessi 2-1, jogu DIT vs Coração adia tanba udan-boot

DILI, 13 Jullu 2026 (TATOLI)—Ekipa Santa Cruz FC susesu iha nia jornada dahitu Liga Futeból Timorense époka 2026 hodi halakon adversáriu Porto Taibessi FC ho golu mihis 2-1, no iha parte seluk, komisaun jogu Liga Timorense deside adia jogu Primeira Divizaun entre klube DIT FC no Coração FC tanba udan-boot halo bee nalihun nakonu iha kampu Estádiu Munisipál Dili.

Vitória ba ekipa Santa Crúz ne’e, lori Santa Cruz provizóriu lidera tabele klasifikasaun ho pontu 17 tuir kedan AD SLB ho pontu 16.

Bainhira árbitu hahú lian husi árbitru Francisco do Rego, ekipa rua lansa kedan kontra-atake. Jerico Piedade no Daniel Appiah lansa ateke ba lina klaran Santa Cruz nian iha minutu 10 primeira parte nian.

Santa Cruz la nonok, jogadór Mario Quintão no Romario Moniz koordena ho sira-nia kolega halo kombate ba atake ne’ebé Portu Taibessi halo.

Sutu barak akontese iha minutu 30-resin, Mario Quintão no Vincent Noerty koordena malu hodi suta rua ba Porto Taibesse, maibé guarda-rede Babtista Ola salva no sutu balu mós la kona iha alvu.

Porto konsentra ba jogu ho kontra-atake maka’as, sira tama husi liña direta Santa Cruz nian, maibé defeza Santa Cruz Claudio Martins ho nia kolega sira metin tebes. Husi defeza ne’ebé metin sira konsege salva no hamate avansadu Jardiel Piedade nia jogu no impede nia atu lansa sutu ba guarda-rede Alexander Quintão.

Iha minutu ikus, atu tama ba tempu adisionál nian, Santa Cruz halo amesa ida liuhusi jogadór estranjeiru Noerty maibé sutu ne’e la kona iha alvu ka semo aas liu baliza nia riin.

Ho forsa ne’ebé hanesan ekipa rua termina jogu ho empata 0-0 iha tempu intervalu nian.

Tama ba segunda parte, Santa Cruz foti inisiativa hodi halo kontra-atake maka’as husi liña klaran, Nilto de Carvalho no Frenteliano dos Santos pasa bola maka’as ba Mario Quintão no Noerty oinsa atu hetan vantajen maibé defeza Taibessi sei metin.

Taibessi halo jogu defensivu no la ansi halo golu bainhira seidauk hetan oportunidade aserta, sira duir bola ba malu husi ain ba ain iha liña klaran no kotuk besik kaixa penalidade nian. Santa Cruz halo atake ne’ebé maka’as, maibé iha minutu 69 lakon kontrolu husi mediu Santa Cruz, jogadór Taibesse Lazio Piedade hadau bola no tiru ba oin, Jardiel Piedade simu kedan no marka golu.

Jardiel tiru ho kalma husu bola aas ne’ebé nia haree Alexander Quintão sai liu iha liur no labele atu tuda aan hodi salva bola ne’e. Golu! Muda rezultadu ba 1-0.

Maske lakon ona golu ida provoka Santa Cruz nia emosaun. Sira nafatin hasa’e ritmu jogu no buka atu halo empata jogu ne’e.

Miguel Soares hamrik la metin, halai ba-mai iha kampu ninin hodi orienta jogadór sira tenke halai ba oin hodi hamate Taibessi nia jogu.

Sants Cruz tenke sakrifika an maka’as, sira joga ho emosaun, ikus iha minutu 82 sira-nia sorte realiza duni basá jogadór Nilton de Carvalho hetan bola ida hodi pasa ba Amancio de Araujo suta ho kalma bola tama liu ba rede kotuk nakdoko. Santa Cruz sai husi impase hodi hakat ba kontente.

Santa Cruz halo dezmantela iha lina kotuk, maibé sira mós joga barak liu ba oin. Hela minutu restu husi minutu 90, iha minutu 89 Santa Cruz hetan tan oportunidade husi jogadór Romario Moniz bainhira bola barullu iha kaixa penalidade no nia hatama uza nia ulun halo Babtista Olo labele salva no hakat la di’ak bola tama liu ba rede laran,  nune’e rezultadu nakfilak ba 2-1.

To’o árbitu lian daikus nian, , vitória prega metin ba Santa Cruz hodi hadau pontu tolu kompletu no Porto Taibessi hela ho derrota.

Udan-boot halo jogu DIT vs Coracão adia

Entretantu, komisaun jogu Liga Timorense deside adia jogu Primeira Divizaun entre klube DIT FC no Coração FC tanba udan-boot halo bee sa’e maka’as kampo Estádiu Munisipál Dili.

Tuir ajenda ne’ebé fó sai husi Liga Timorense duelu entre ekipa rua hala’o tuku 19h00, maibé jogadóf ofisiál no adeptus sira to’o ona iha Estádiu udan-boot halo ekipa rua labele realiza jogu.

Komisariu jogu husi Liga Timorense hamutuk ho ekipa Arbitrajen no jetente klube rua konkorda malu hodi muda jogu ba loron ( tersa 14/jullu) tuku 16h00 iha Estádiu Munisipál Dili.

Tuir dadus ne’ebé fó sai husi Liga Timorense ekipa DIT daudaun ne’e provizóriu okupa tabela klasifikasaun iha pozisaun neen ho pontu neen, enkuantu Coração okpa pozisaun dahitu ho pontu neen, pontu hanesan maibé DIT nia golu barak liu.

Jornalista : Hortêncio Sanchez

Editór       : Cancio Ximenes