DILI, 13 Jullu 2026 (TATOLI)—Ministru Juventude Desportu Arte no Kultura (NJDAK), Nelyo Isaac Sarmento, hato’o parabéns ba mídia TATOLI tanba neineik-neineik hahú dezenvolve an, maibé keta haluha katak produtu jornalístiku ne’e la’ós de’it oinsá atu hetan informasaun maibé parte ida mós oinsá atu eduka populasaun.
“TATOLI eduka populasaun ho hanoin ne’ebé kualidade ba kontirbui ita-nia dezenvolvimentu nasionál,” Ministru Nelyo Isaac Sarmento hateten ba Agência TATOLI, ohin.
Tanba ida-ne’e, Antigu Sekretáriu Estadu Komunikasaun Sosiál (SEKOMS) ne’e dehan, Agência TATOLI kontinua kuidadu ninia produtu jornalístiku sira hodi nune’e bele fó naroman ba sosiedade Timor-Leste.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, indepedente, inzenta, klareza no nafatin iha integridade no mós kredibilidade.
Jornalista : Alexandra da Costa
Editór : Cancio Ximenes
