DILI, 14 Jullu 2026 (TATOLI)—Klube Primeira Divizaun Aitna FC falla iha nia jornada dahitu Liga Futeból Timorense hafoin derrota 1-2 kontra Assalam FC, iha Estádiu Munisipál Dili, tersa kalan.
Bainhira jogu hahú ekipa rua lansa kedan kontra-atake ba malu tuir tékniku no abilidade ne’ebé iha oinsá atu buka hatama golu.
Aitana hala’o jogu ho intensidade ne’ebé aas atu defende pontu tolu importante husi jogu ne’e, maibé Assalam halo defensivu maka’as no loke jogu ba lina klaran, avansadu Augosto Ramos halai ba oin lansa amesa ida maibé sutu ne’e sees husi alvu.
Maske hetan presaun husi Aitana la implika ba Assalam FC hodi hala’o nia jogu. Nune’e iha minutu 45, Assalan loke kontajen Natalicio Soares ne’ebé konsege marka golu dahuluk bainhira bola barullu iha kaixa penalidade Aitana nian antes árbitu ba deskansa no golu ne’e fó vantajen 1-0 ba ekipa farda mean-amarelu.
Tama ba segunda parte, Assalam domina bola hodi loke sira-nia vantajen maibé Aitana halo atake ne’ebé adekuadu, nune’e Assalam seidauk bele prodús golu.
Aitana buka maneira oioin husi jogu bola long ka bola aas maibé defeza Assalam metin no la fó Aitana halo jogu tuir sira-nia hakarak.
Iha minutu 54, to’o ona Assalam nia turnu hodi duplika sira-nia vantajen liuhusi avansadu Augusto da Costa hodi marka tan golu ida ba Aitana muda rezultadu ba 2-0.
Aitana la rende, kontinua kaer bola joga ho kalma iha kampu laran, sira luta ho emosaun, sira halai ho velosiade, oinsá atu hamenus sofrimentu.
Ikus iha minutu 58, Aitana hamenus duni sira-nia sofrimentu liuhusi jogadór João Soares hodi marka golu ida muda rezultadu ba 2-1.
Aitana hatudu jogu ho performe ne’ebé di’ak, sira hadau oportunidade oinsá atu halo empata jogu maibé defeza no guarda-rede Asslam solidu Aitana labele aumenta tan vantajen. Assalam mós laiha tan oportunidade prodús golu to’o árbitu lian ikus ne’e vitória monu ba Assalam.
Husi vitoria ne’e lori Assalam ba rekolla pontu tolu hodi aumenta sira-nia pontu ba ualu. Enkuantu Aitana mantein ho pontu tolu kandidatu ba degradasaun ka tun ba segunda divizaun.
Jornalista : Hortêncio Sanchez
Editór : Cancio Ximenes
