Embaixadora Kuba atualiza progresu kooperasaun ba Xefe Estadu 

DILI, 14 Jullu 2026 (TATOLI)-Embaixadora Kuba iha Timor-Leste, Grisel Alina Aldama Innis, hasoru malu ho Prezidente Repúblika, José Ramos-Horta, hodi atualiza kona-ba progresu kooperasaun ne’ebé Kuba oferese ba Timor-Leste.

“Ami iha priviléjiu atu fó atualizasaun ba Prezidente Repúblika kona-ba progresu kooperasaun ne’ebé Kuba oferese ba Timor-Leste. Hanesan ita hotu hatene, Brigada Médika Kuba daudaun serbisu iha munisípiu 12 hotu nomós iha Oekusi”, nia hateten iha Palásiu Prezidénsial Bairu Pité, Dili, ohin.

Diplomata ne’e dehan iha enkontru ne’e informa ba Prezidente Repúblika katak médiku kubanu sira hala’o sira-nia serbisu no fó atendimentu saúde ba komunidade iha fatin hirak ne’ebé sira destina bá.

Aleinde ne’e, aborda mós kona-ba perspetiva kooperasaun iha futuru atu haluan serbisu hamutuk iha área seluk siha sosiedade no ekonomia Timor-Leste.

“Ami mós ko’alia kona-ba preparativu ba komemorasaun aniversáriu ba da-100 husi Komandante Fidel Castro, ne’ebé sei selebra iha loron 13 Agostu. Embaixada Kuba iha Timor-Leste daudaun prepara atividade espesiál ida atu marka data istórika ida-ne’e, no konvida nia atu partisipa iha atividade ne’ebé embaixada sei organiza”, dehan.

Enkontru ne’e fó oportunidade atu hametin lasu amizade no solidariedade ne’ebé durante ne’e liga nasaun rua.

“Mensajen husi Prezidente mak kontinua hanesan tempu uluk, hametin kooperasaun, entendimentu mútua no apoiu ba solidariedade ne’ebé Kuba fó ba Timor-Leste. Prezidente valoriza relasaun amizade entre nasaun rua, ne’ebé dezde Timor-Leste hetan independénsia iha inísiu sékulu XXI, Kuba kontinua fó apoiu ba povu timoroan”, hateten.

Kona-ba konvite ba Prezidente atu partisipa iha komemorasaun tinan 100 Fidel Castro, asuntu ida-ne’e, Ramos-Horta manifesta nia vontade atu partisipa. Tanba nia iha ajenda nasionál no internasionál ne’ebé nakonu tebes, maibé sei buka tempu ida ne’ebé apropriadu atu ajusta.

Jornalista: Arminda Fonseca 

Editora: Maria Auxiliadora